Jeńis kúnine oraı Astanada merekelik is-sharalar ótti

ASTANA. 9 mamyr. Búgin – Uly Jeńis kúni Astananyń basty alańdarynda merekelik is-sharalar ótti. Oǵan elimizdiń ár aımaǵynan kelgen 500-ge jýyq Uly Otan soǵysynyń ardageri men tyl eńbekkeri jáne qala turǵyndary qatysty. Bul týraly egemen.kz habarlady. Jeńis kúnine oraı aksııany uıymdastyrýshylar saltanatty qabyldaý ótkizip, shatyrly qalashyqtar turǵyzdy. Osyndaı qalashyqtardyń birine jaýapty – Astana qalasy Tabıǵat qorlary basqarmasynyń jetekshisi Mıras Gaısın óz shatyrlarynda 50-ge jýyq ardagerge qurmet kórsetkenderin aıtty. «Bul ardagerler Qyzylorda men Astana qalasynan kelgen. Biz olarǵa keń dastarqan jaıyp, shyn júrekten tilek bildirdik. Qart maıdangerlerdiń qurmetine konserttik baǵdarlama qoıyp, olarǵa beıbitshilik úshin alǵysymyzdy aıttyq», – deıdi basqarma jetekshisi. Shara sheńberinde «Otan qorǵaýshylar» monýmentine jınalǵan qaýym jaýynger botqasynan dám tatsa, Astananyń ashyq alańdarynda Uly Jeńistiń 70 jyldyǵyna arnalǵan konserttik baǵdarlamalar qoıyldy. Dál osyndaı merekelik sharalar «Báıterek» monýmenti, qala ákimdigi aldyndaǵy alań, «Stýdent» parki, «Jastar» teatry men Esil ózeniniń jaǵasynda da uıymdastyryldy. Qurmetti qonaqtardy merekelik sharalarǵa alyp kelý úshin qalalyq avtobýs parki 11 jaıly avtobýsyn usynǵanyn aıta keteıik. Elaman Qońyr. Derek: egemen.kz. Sýret: yvision.kz.