Ortalyqtyń ashylý saltanatyna Mańǵystaý oblysynyń ákimi Nurdáýlet Qılybaı, Tótenshe jaǵdaılar mınıstri Shyńǵys Árinov, oblystyq jáne jergilikti atqarýshy organdardyń ókilderi, ardagerler men departament qyzmetkerleri qatysty.
Alǵashqysy – Aqtaý qalasynda modýldik qurylymy bar jańa angarlyq órt deposy. Jańa nysan Aqtaý qalasynyń tómengi shaǵynaýdandary men Prımorskıı shaǵynaýdanyn, sondaı-aq О́mirzaq aýylyn, óndiristik jáne demalys aımaqtaryn qamtıtyn aýmaqqa qyzmet kórsetedi. Jalpy halyq sany shamamen 40 myń adam. Depo zamanaýı tehnıkalarmen, jeke quramǵa arnalǵan demalys jáne turmystyq aımaqtar, oqý synyptary, jabdyqtar men arnaıy kıimdi saqtaý bólmeleri, dıspetcherlik jáne baılanys júıelerimen tolyq jabdyqtalǵan. Sondaı aq, saltanatty shara barysynda órt deposyna eki ANR 150 «Kamaz» markaly órt sóndirý avtokóli, bir avtokran jáne úsh «Skoda Kodiaq» markaly qyzmettik kóliktiń kiltteri tabystaldy.
Ekinshisi – Tushyqudyq aýylynda aýyl turǵyndarynyń qaýipsizdigin arttyrý maqsatynda ashylǵan jańa erikti órt posty. Bul nysan Shebir jáne Qııaqty aýyldaryna qyzmet kórsetedi, onda 3 400-den astam adam turady. Post zamanaýı tehnıkamen jáne 24 saǵat boıy qyzmet kórsetýge qajetti barlyq jaǵdaımen qamtamasyz etilgen. Munda 8 órt sóndirýshi qyzmet atqarady.
Úshinshisi – Qaraqııa aýdanynda Tótenshe jaǵdaılar bólimine arnalǵan biregeı ákimshilik ǵımarat ashyldy. Bir qabatty 288 sharshy metr aýmaqtaǵy ǵımarat qazirgi zamanǵy standarttarǵa saı salynǵan. Munda bólim basshysy men ınspektorlar kabınetteri, akt zaly, azamattardy qabyldaý bólmesi qarastyrylǵan. Jańa ǵımarat Qaraqııa aýdanynda azamattyq qorǵaý júıesin nyǵaıtýǵa, qyzmet sapasyn arttyrýǵa jáne turǵyndarǵa zamanaýı jaǵdaıda qyzmet kórsetýge múmkindik beredi. Aýdan halqy shamamen 38 400 adamdy quraıdy.
Mańǵystaý oblysynyń ákimi Nurdáýlet Qılybaı jańa nysandardyń ashylýy óńirdegi órt qaýipsizdigin aıtarlyqtaı kúsheıtetinin, turǵyndardyń qaýipsizdigin qamtamasyz etýdi basty maqsat dep sanaıtynyn atap ótti.
«Búgingi úsh jańa órt sóndirý ortalyǵynyń ashylýy – óńirdiń órt qaýipsizdigin kúsheıtýge baǵyttalǵan mańyzdy qadam. Jańa nysandar turǵyndardyń qaýipsizdigin qamtamasyz etýge, tótenshe jaǵdaılarǵa jedel áreket etýge jáne qyzmet sapasyn arttyrýǵa múmkindik beredi. Bizdiń basty maqsatymyz – azamattarymyzdyń qaýipsizdigin qorǵaý jáne óńirdegi azamattyq qorǵaý júıesin odan ári nyǵaıtý», dedi Nurdáýlet Qılybaı.
