Almatyda alǵash ret «Máńgilik polk» sharasy uıymdastyryldy

ASTANA. 9 mamyr. Almatyda Jeńistiń 70 jyldyǵyna oraı «Máńgilik polk» azamattyq sharasy uıymdastyryldy. Oǵan ártúrli jastaǵy 1 000-nan astam adam qatysyp, «Astana» alańynan «28 panfılovshylar» saıabaǵyna deıin jaıaý júrip ótti. Bul týraly «QazAqparat» habarlady. Sharaǵa qatysýshylar Uly Otan soǵysyna qatysqan atalary men ákeleriniń jáne týǵan-týystarynyń sýretterin ustap shyqty. Saıabaqqa kelgen olar Máńgilik alaýǵa gúl shoqtaryn qoıyp, qazaqstandyq jaýyngerlerdiń soǵystaǵy erlikterin eske aldy. «Máńgilik polk» sharasy alǵash ret 2012 jyly Reseıdiń Tomsk qalasynda ótti. 2013 jyly 120 qalada uıymdastyrylsa, byltyr 7 eldiń 500-den astam qalasynda jarty mıllıon adam kóshege shyqty. Al Almatyda atalǵan aksııa alǵash ret ótip otyr. Aıta keteıik, «Máńgilik polk» azamattyq aksııasy búgin elimizdiń birqatar iri qalalarynda uıymdastyryldy. Elaman Qońyr. Derek, sýret: «QazAqparat».