Ádebıettiń túrli janrynda qalam tartqan sýretkerlerdiń jeke zattary, ómiri men shyǵarmashylyǵyna qatysty biregeı muraǵat materıaldary, foto-qujattary, hattary, eńbekteri ekspozısııa tórinen oryn alǵan. Solardyń qatarynda 1975 jyly J.Moldaǵalıevtiń mýzeı qoryna ózi tabystaǵan dombyrasy, 1972 jyly S.Muqanovtyń jary Márııam Muqanova mýzeıge syıǵa tartqan S.Seıfýllın týraly qoljazbalarynyń alǵashqy nusqasy, M.Qarataevtyń eń qundy qujattary men marapattaryn erekshe ataýǵa bolady.
Qamshy – qazaqtyń dástúrli mádenıeti men turmysynda mańyzdy oryn alǵan qural desek, osy dástúrdi berik ustanǵan M.Maǵaýın tirshiliginde qamshy jınaýdy ádetke aınaldyrǵan. 2014 jyly mýzeıge jazýshy óz qolymen 13 qamshysyn tabystaǵan.
«Ulttyq ortalyq mýzeıdiń baı qorynda ultymyzdyń mádenıeti men ádebıetin qalyptastyrýda óshpes iz qaldyrǵan kórnekti tulǵalar men qalamgerlerdiń jádigerleri erekshe oryn alady. Ádebıet maıtalmandary qaldyrǵan mol mura, oı tereńdigi, ult taǵdyryn júregimen sezingen shyǵarmalary ár býynǵa shamshyraq bolyp qala beredi. Búgingi mereıtoılyq kórme – sol asyl esimderdi ulyqtaý, ádebı murany dáripteý, urpaq sanasyna amanat etý jolyndaǵy mańyzdy qadam», deıdi Ulttyq ortalyq mýzeı dırektorynyń orynbasary Araıly Baqytqyzy.
Kórmeniń ashylý saltanatynda Jazýshylar odaǵy basqarma tóraǵasynyń orynbasary Beıbit Sarybaı, jazýshy-dramatýrg Sultanáli Balǵabaev kórme qundylyǵy týrasynda sóz sóılep, is-sharaǵa arnaıy shaqyrylǵan M.Qarataevtyń týysy Shoqan Orazaev pen kelini Jámılá Qulanbaıqyzy tarıhı tulǵalardyń ómirine qatysty tyń esteliktermen bólisti.
Kórmeniń taǵy bir mańyzdy tusy retinde, taǵylymdy sharaǵa S.Muqanov pen Ǵ.Músirepovtiń ádebı-memorıaldyq mýzeı kesheni de ún qosqanyn ataǵan jón. Máselen, Sábıt Muqanovtyń mýzeı-úıinen kórmege jazýshynyń jeke tutynǵan zattary arnaıy ákelinipti. Jazýshynyń «Admıral» kınokamerasy, kúmisten jasalǵan jazý quraly jıyntyǵy, altyn qolsaǵaty, magnıtofon-dıktofony, kostıým-shalbary, Jazýshylar odaǵyna múshelik bıleti, áskerı bıleti jáne depýtattyq bıletteri, sondaı-aq jazýshynyń fotosýretteri kórmedegi mańyzdy jádigerlerdiń qatarynda.
ALMATY
