Qusbegiler qatarynda jasóspirimderden bastap tájirıbeli áýlettik saıatshylarǵa deıin bar. Sonymen qatar Mońǵolııa, Qytaı, Qyrǵyzstan jáne О́zbekstannan kelgen saıatshylar da júr.
«Qyran qustarmen ań aýlaý – qazaq halqynyń tarıhynda erekshe oryn alatyn óner. Baıjúnis Kódekovtiń rýhy urpaqtardy biriktirip, jastardy babalar murasyn úırenýge yntalandyrady. Ol – Almaty oblysyndaǵy Jalaıyr Shora atyndaǵy búrkitshiler mektebiniń negizin qalaýshylardyń biri. Onyń esimi ulttyq sportty saqtaý jáne nasıhattaýmen tikeleı baılanysty», dedi.
Eńbekshiqazaq aýdany ákiminiń orynbasary Erbolat Sarabekov.
IýNESKO-nyń materıaldyq emes mádenı mura tizimine engen bul óner búginde zamanaýı sport túrine aınalyp, dala mádenıetiniń sulýlyǵyn jáne búrkitshilerdiń sheberligin ortaǵa salyp otyr. Búrkitshi Baıjúnis Kódekovtiń nemeresi Baýyrjan «Bizdiń otbasymyz úshin atamyzdyń murasyn qurmettep, ony ulyqtaý – úlken mártebe. Onyń esimi túrli elden kelgen sheberlerdi biriktirip, saıatshylyq ónerdiń jas býynǵa jalǵasýyna sebep bolyp otyr», deı kelip, uıymdastyrýshylarǵa rızashylyǵyn bildirdi.
Al týrnırdi uıymdastyrýshy, «Qusbegilik» federasııasynyń vıse-prezıdenti Baǵdat Múptekeqyzy «Qyran» etnoortalyǵynyń ulttyq óner damýyna qosyp jatqan úlesin aıryqsha atady. Búginde ortalyqta oqý baǵdarlamalary iske asyp, dástúrdi saqtaýǵa baǵyttalǵan kóptegen jobalar júrgizilip keledi. Sondaı-aq óskeleń urpaqty búrkit pen tazyny baptaýmen qatar, halyqaralyq chempıonattar uıymdastyrýǵa muryndyq bolyp otyrǵan ortalyqtyń basty maqsaty – babadan jalǵasqan baı murany keler urpaqqa aman jetkizý.
Alataýdyń bókterinde ótken bul týrnır 27-ret uıymdastyryldy. Baǵdarlama ulttyq kıim men jabdyqty baǵalaý, «qolǵa qondyrý», «qońyraýǵa shaqyrý», «dalbaımen jumys isteý» syndy birneshe baǵyttan turady. Týrnır nátıjeleri boıynsha qolyna qyran qus qondyrǵan saıatshylar naǵyz sheber ekenderin ańǵartty.
Atap aıtsaq, «Búrkit» atalymy boıynsha chempıon ataǵyn Astana qalasynan kelgen Erasyl Serikbekuly jeńip aldy. Ol bul jarysqa 15 jyldan beri qatysyp keledi.
«Qarshyǵa» atalymynda – Jambyl oblysynan kelgen Babajan Berikbolsyn jeńimpaz atansa, «Itelgi» atalymynda – qaraǵandylyq Tanat Ospanqulov úzdik shyqty.
Almaty oblysy
