Bálkim mundaı oqıǵa bolyp ta jatqan shyǵar. Aqmola oblystyq kópbeıindi aýrýhanasynyń janyndaǵy onkologııalyq dıspanserdiń hımııa terapııa bóliminiń meńgerýshisi Meńdigúl Latıftiń basynan ótken taǵdyrdyń tálkegin jan dúnıeń tebirenbeı tyńdaý tipti de múmkin emes. Atam qazaqtyń «birinshi baılyq – densaýlyq» deýi de osydan shyǵar.
Meńdigúl Saýythanqyzy S.Asfendııarov atyndaǵy Almaty qazaq ulttyq medısınalyq ýnıversıtetiniń túlegi. Eńbek jolyn Almatyda bastaǵan. Keıin Mońǵolııanyń Baıan-О́lgeıinde úlken klınıkada tabysty eńbek etken. Arada biraz jyl ótken soń atajurtyna oralyp, soltústik óńirden dám buıyrǵan.
– Aıyrtaý aýdandyq aýrýhanasy hırýrgııa bóliminiń meńgerýshisi bolyp jumys istep júrgen kezimde asa iri jol apaty boldy. Birden segiz adam aýrýhanaǵa tústi. Jalǵyz ózim operasııa jasadym. Bálkim sol kezde vırýs juqtyryp aldym ba dep oılaımyn, ómir men ólim tarazy basyn alma-kezek tartyp jatqanda qaýipsizdik sharalaryn túgel saqtaý múmkin emes qoı. Ondaıda bar nıetiń adamdardy qutqaryp qalý ǵana bolady. О́z basyńdy oılap, tartynyp turý sirá da múmkin emes. Jumys barysynda mundaı oqıǵalar óte kóp boldy, – deıdi M.Saýythanqyzy.
Áýel basta eleń qylmaǵan. Qaýipti vırýs ýaqytsha qalǵyp ketkenge uqsaıdy. 2019 jyly joldasy Oljabaı búırek aýrýyna shaldyǵady. Qatty kúızelistiń saldarynan vırýs oıanyp ketse kerek. Endi tán azaby Meńdigúldiń ózin qınaı bastaıdy. Qan suıylǵan, aıaq-qoly isken. Sonda da jumysyn jalǵastyra beredi. Dert janyna batqan soń emdelýdiń jolyn izdeıdi. Astanaǵa baryp qaralady. Baýyr aýrýymen shuǵyldanatyn professordyń aqyl-keńesin tyńdaıdy. Bolashaq bulyńǵyr, erteńgi kún qarańǵy. Densaýlyq saqtaý mınıstrligine kirgen. Shetelderde emdelýge nıet etken. Biraq qaıran bolmady. Dátke qýat – japon dárisi tym qymbat. Bar jıǵan-tergenin jumsaǵan, baspanasyn satqan. Úmit jibi qolynan sýsyp bara jatqandaı. Jaryq kúnniń jalǵyz sáýlesi qymbat qoı. Kishkentaı qyzyn, jalǵyz ulyn, jan jaryn oılaıdy. Mundaıda kóńilge ne kelmeıdi. Áli de ómir súrgisi keledi. Qanshama naýqasty emdep, alǵysyn arqalap, aq batasyn alyp edi. Bir qaıyry bolar degen. Ishteı mújildi, biraq, synǵan joq. Ana rýhynyń myqtylyǵy. Qalaı qaıran qalmassyń. Botadaı bozdap, bordaı tozyp ketetin-aq jaı. Jalǵyz qalsa boldy qarańǵy, qalyń oılar qaýmalaıdy, janyn jegideı jeıdi. О́mir-ózenniń sarqyraı aǵyp kelip, qumǵa sińer jeri osy bolǵany ma?
Máıit donorlardyń sharapaty tıer me dep te oılaǵan. Oı onǵa, sana segizge bólinip júrgen tusta uly Dinbolat anasynyń jan kúızelisine shydaı almaı, búıregimniń bir bóligin men beremin ana, demesi bar ma. Alty jyl azapty aýrýmen alysqan ana júregi shym ete tústi. О́zi de dáriger bolǵan soń bul saladaǵy jańalyqtan habardar. Elimizde máıit donorlardyń kezegi de uzaq eken. Shamamen tórt myńdaı adam kezekte tur. Ol jetkenshe qashan. Biraq balasyn oılaıdy. Tepse temir úzetin jigit. Erkin kúresten sport sheberi. Respýblıkalyq, halyqaralyq jarystarda júlde alyp júr. Múmkin emes, balasynyń baǵyn baılaǵan durys bolmaıtyn shyǵar. Bolashaǵyn oılap ózi de jylaıdy. Uly men qyzy da, nemeresi de.
Birde moınynan qan ketti. Sup-suıyq, jylymshy qan. Jan júregi eljirep ketken bolar, myna kórinis janyna batqan uly naǵyz erlerge tán minezben:
– Boldy endi, eshqandaı donordy kútýdiń qajeti joq – deıdi.
Perzenttik shynaıy peıilmen, tańǵy shyqtaı móldiregen appaq mahabbatymen táýekelge bel býǵan bolar. Júzinde qorqynysh-qobaljý joq. Qıyndyqqa bekingen, sharbolattaı shıryqqan qalpy. Oǵan da ońaı emes qoı. Onsyz da jany júdep, júregi jylap júrgen anasynyń bosańsyǵanyn kórgisi kelmegen bolar. Ulttyq onkologııa jáne transplantologııa ǵylymı ortalyǵynda Dinbolattyń baýyrynyń bir bóligin alýǵa 6,5 saǵat, anasyna 9,5 saǵat operasııa jasaldy.
– Men ózimniń áriptesterim dárigerlerge tolyq sendim. Osylaısha, 57 jasymdy jansaqtaý bóliminde qarsy aldym, – deıdi M.Saýythanqyzy.
Esin jıysymen balasyn izdegen. Kóńili bosap, kóziniń jasyn kól etken. Jansaqtaý bóliminde segiz kún jatqanda janyn qoıarǵa jer taba almaı, baýyr eti balasyn ańsaýmen bolǵan.
– Ekeýimiz kezdeskenshe qutty bir ǵasyr ótkendeı. Jansaqtaý bóliminen túsirgen kezde bólmeme ulym kirip keldi, – deıdi keıipkerimiz, – júregim jarylyp keterdeı qýandym.
Únsizdik. Aýyr oılardy arqalaǵan, jan dúnıesin astań-kesteń etken azapty sát. Bir-birin janarlarymen aımalap, jan júrekterimen qushaqtaǵandaı. Anasyna ekinshi ómir syılaǵan perzenti Dinbolat qazir sport mektebinde jattyqtyrýshy, ózi de otbasyly. Perzentteri quldılap júgirip júr. Al Meńdigúl Saýythanqyzy dıspanserde naýqastarǵa em-dom jasaıdy.
Kókshetaý
