Almatyda qarýly qaraqshy 9 mln. teńgeni tartyp áketti

ASTANA. 9 mamyr. Almaty qalasynda qarýly qaraqshy «REM Kran» jaýapkershiligi shekteýli seriktestiginiń qyzmetkerlerine shabýyl jasap, 9 mln. teńgeni tartyp áketti. Bul týraly news.mail.ru habarlady. Urlanǵan aqsha «REM Kran» fırmasy jumysshylarynyń eńbekaqysyn tóleýge arnalǵan eken. Kýágerlerdiń aıtýynsha, seriktestik qyzmetkerleri kólikten túsip, ǵımaratqa kirip bara jatqan. Týra kireberiste olarǵa qolynda travmatıkalyq tapanshasy bar er adam jaqyndaıdy. Qarýly qaraqshy qyzmetkerlerdiń biriniń qolyndaǵy sómkeni tartyp alyp, birneshe ret oq atqan. Osydan keıin qylmysker oqıǵa ornynan qashyp ketken. Shabýyl kezinde aýyr jaraqattanǵan fırma qyzmetkerleriniń biri sol jerde kóz jumdy. Al arqasynan aýyr jaraqattanǵan ekinshisi dereý aýrýhanaǵa jóneltildi. Qazirgi tańda bul qandy oqıǵa boıynsha «Adam óltirý» babymen qylmystyq is qozǵaldy. Oqıǵaǵa oraı qalalyq ishki ister departamenti krımınaldyq polısııa qyzmetkerleri men Naýryzbaı aýdandyq ishki ister basqarmasynyń saqshylarynan arnaıy jedel-tergeý toby quryldy. Qylmyskerdi quryqtap, jeke tulǵasyn anyqtaý maqsatynda birqatar jedel-tergeý is-sharalary júrgizilýde. Polısııa qyzmetkerleri shabýylǵa qatysty ózge de málimetterdi anyqtaýdy qolǵa aldy. «REM Kran» jaýapkershiligi shekteýli seriktestiginiń saıtyndaǵy aqparattarǵa súıensek, fırma 1985 jyly «Oblteplokommýnenergo» óndiristik birlestik bazasynda qurylǵan. Kásiporyn qazan, qazan-qosymsha jáne taǵy basqa qurylǵylardy jasap shyǵarady. Al 1996 jyly «REM Kran» seriktestigi júk kóteretin qurylǵylar naryǵyna qaıta mamandanady. Kásiporynnyń qazirgi basty qyzmeti – júk kóteretin krandardy jasap shyǵarý, qalpyna keltirý, qaıta qurý, sondaı-aq, júk kóteretin kólikterdiń shynjyrlaryn quramdaý bolyp tabylady. Elaman Qońyr. Derek, sýret: news.mail.ru.