Erlan Saırov depýtattyq saýalynda búginde árbir jeksenbi saıyn aýyl, aýdan, qala ákimderiniń saılaýy ótip jatqanyn atap ótti.
Alaıda májilismen máseleniń pysyqtaıtyn tustary bar ekenine nazar aýdardy.
«Áli de saılanyp jatqan aýyl ákimderiniń quzyretin, olardyń áleýmettik-ekonomıkalyq múmkindigin retteý qajet ekenine kózimiz jetip otyr. Zań aıasynda aýyl ákimderiniń quzyretin áli de keńeıtýimiz qajet. Tórtinshi bıýdjetti qalyptastyrý tetikterin zańmen pysyqtaýymyz tıis», dedi depýtat.
Búginde elimizde aýdan, qala ákimderin saılaý pılottyq jobasy aıasynda 52 ákim saılanǵan. Dese de depýtat saılanǵan aýdan ákimderiniń arasynda bir jylǵa jetpeı jumysynan ketkender de bar ekenin jetkizdi.
Buryn qala, aýdan ákimi bolǵan Marhabat Jaıymbetov áriptesiniń usynysyn qoldady. Ol aımaqtardy aralaý barysynda aýdan ákimderin tikeleı saılaý júıesi áli de pysyqtaýdy qajet etetinine kóz jetkizgen.
«Aýdanǵa bólinetin qarjy máselesin retteý qajet. Al aýdan ákimderiniń quzyreti boıynsha birneshe zańǵa ózgeris engizý kerek. Mysaly, bilim berý salasynyń shyǵystary oblystyq bıýdjette qalyp, kiristeri aýdan bıýdjetinde. Qazir aýdan ákimderinde quzyret az, jaýapkershilik kóp. Tipti bilim, densaýlyq, veterınarııa salasy, jumyspen qamtý ortalyqtary aýdan ákimine baǵynbaıdy. Eń bastysy, aýyl ákimderin saılaýdyń 5 jyldyq kezeńin kútip, aýylda saılanǵan ákimderdiń tájirıbeli korpýsyn daıarlaý mańyzdy. Sonda ǵana saıası, eń bastysy kásibı kadrlar rezervi qalyptasady. Sondyqtan oǵan ázirge ýaqytsha toqtaý qoıyp, jan-jaqty pysyqtaǵanymyz jón», dedi Marhabat Jaıymbetov.
Buǵan qosa, Erlan Saırov aýdan ákimderiniń saılaýyna qyrýar qarajat ketetinin alǵa tartty.
«Tek bıyldyń ózinde 6 aýdan ákimi men 1 oblystyq mańyzy bar qala ákiminiń saılaýy ótti. Osynyń ózine memlekettik bıýdjetten 1 mıllıard teńgege jýyq qarajat jumsaldy», dedi depýtat.
О́z sózinde Erlan Saırov aýyldyq okrýg ákimderiniń saılaý júıesin engizý bes jyl boıy kezeń-kezeńimen júrgizilip kele jatqanyn aıtyp, aýdan ákimderin saılaý máselesine júıeli ári jan-jaqty zerdelengen tásil qajet ekenine toqtaldy.
Bul rette ol álemdik tájirıbege arqa súıegen saıası sarapshylar men memlekettik basqarýda tájirıbesi bar azamattardyń «aýdan ákimderin máslıhat depýtattary da saılaı alady» degen pikirin ortaǵa saldy.
Sondaı-aq, depýtattar osynaý mańyzdy máselede asyǵystyq tanytýǵa bolmaıtynyna nazar aýdaryp, usynystyń saılaý prosesin shekteýge emes, kerisinshe halyqtyń saılaýǵa degen senimin arttyrýǵa baǵyttalǵanyn eskertti.
Sóz sońynda qos depýtat jergilikti ózin-ózi basqarý, memlekettik qyzmet, saılaý, óńirlerdi damytý týraly kóptegen zańdarǵa qajetti normalardy engizgenshe, aýdan deńgeıindegi ákimderdiń tikeleı saılaýyn toqtata turýdy usyndy.
