Qyrǵyzstanda áıelderdi Sırııadaǵy soǵysqa jiberýshi top ustaldy

ASTANA. 9 mamyr. Qyrǵyzstan ishki ister mınıstrliginiń qyzmetkerleri áıelderdi Sırııa terrıtorııasynda bolyp jatqan urys qımyldaryna qatysýǵa azǵyryp, attandyryp turýmen aınalysatyn qylmystyq top áreketiniń jolyn kesti. Bul týraly Qyrǵyzstan ishki ister mınıstrliginen habarlandy. «Bizdiń qyzmetkerlerimiz júrgizgen jedel sharalardyń nátıjesinde ońtústik aımaqta áıelder ekstremızmi dep atalatyn júıe anyqtaldy, - delingen vedomstvo baspasóz qyzmeti taratqan habarlamada. – Ol eldiń ońtústik aımaqtarynda jumys jasap jatqan úgitshilerden, azǵyrýshylardan jáne olardyń lıderlerinen quralǵan». Azǵyrýǵa túsip qalǵandardyń bári áıelder bolyp shyqty. Olar Qyrǵyzstanda «atıncha» dep atalatyn áıelder arasyndaǵy ekstremısterdiń astyrtyn uıymynyń músheleri bolyp tabylady. Mınıstrliktiń málimeti boıynsha, bul top sońǵy ýaqyttary belsendilikterin arttyrǵan. «Olarǵa ózderi udaıy baılanys jasap turatyn jekelegen birlestikter, qorlar men úkimettik emes uıymdar úlken kómek kórsetedi», - delingen habarlamada. Mundaı uıymdardyń bir bóligi dinı-aǵartý jumystarymen aınalysady. «Áıelder ekstremıstik uıymdarynyń dinı lıderleri ózderine yńǵaılary keletin boıjetkenderdi izdestirip, olardyń psıhologııalyq, moraldyq jáne basqa da erekshelikterin zertteýmen shuǵyldanǵan, - dep atap kórsetedi mınıstrlik. – Sosyn odan ári daıyndyqtan ótýdi usynady». Qyrǵyz mılısııasynyń qyzmetkerleri qatarǵa jańadan qabyldanǵandar sapynda «ekstremıstik ıdeıalar úshin óz ómirlerin qurban etýge daıyn turǵandardyń kóp» ekenin atap ótedi. Ázirge tergeýdiń múddesine oraı ustalǵan top músheleri jónindegi málimetter taratylyp otyrǵan joq. Resmı málimetter boıynsha, ótken jyly Sırııa men Irakqa urys qımyldaryna qatysý úshin Qyrǵyzstannan 230-ǵa jýyq adam attansa, olardyń 30-y áıelder bolǵan. Ketkenderdiń 30-ǵa jýyǵy qazirge deıin qaza tapqan. Murat Aıtqoja. Derek, sýret: Qyrǵyzstan ishki ister mınıstrligi.