«Bul – úıde ermek etetin isimiz. Birde shahmat satyp aldyq. Odan keıin shahmat tastaryna shapan jaýyp, qazaqy oıý-órnekpen árlep, ulttyq úlgide qaıta jasap shyqsaq qaıtedi degen oı keldi. Aldymen oıyn tastarynyń sıfrlyq úlgisin syzbaǵa túsirip aldyq. Bári daıyn bolǵan soń, birtindep basyp shyǵara bastadyq. Bul jumysqa táýligine 3-4 saǵat ýaqyt bóldik. Kúni boıy áýrege túsken kezder de boldy. О́ıtkeni músinshelerdi basyp shyǵaryp jatqanda aýa temperatýrasy qolaısyz bolyp qalady da, bárin qaıta bastaýǵa týra keledi. Keıde jaryq sónip qalady. Osylaısha, sharshy taqta ústindegi patshanyń ornyn han basty. Ýázirdiń ornyna hanshany, pildiń ornyna qanatyn qomdap turǵan qos qyrandy qoıdyq. Eki atty da oıý-órnekpen ásemdep bezendirip, qazaqtyń qazanatyna uqsattyq», deıdi Alekseı Vrazovskıı.
Erli-zaıyptylar ulttyq úlgidegi shahmatty polılaktıd dep atalatyn materıaldan jasap shyǵarǵan.
«Aldaǵy ýaqytta 3D tehnologııasynyń kómegimen qazaq halqynyń ulttyq mádenıetin dáripteıtin basqa da dúnıelerdi jasap shyǵarǵymyz keledi. Mysaly, qazir biz «Altyn adamnyń» kóshirmesin jasap jatyrmyz. Onyń alǵashqy nusqasyn qyzymyz oqyp jatqan mektepke tartý etpekpiz», deıdi sheberler.
Qostanaı oblysy
