Kesh aldynda konsertke qatysatyn ánshiler halyqpen tildesip, qyzyl kilem arqyly júrip ótip, áserlerimen bólisti.
Qazaq óneriniń maıtalmandary, kúmis kómeı ánshiler Maıra Ilııasova, Nurlan О́nerbaev, Ulyqpan Joldasov, Qanat pen Svetlana Aıtbaevtar, Mádenıet salasynyń úzdigi, «Qurmet» ordeniniń ıegeri, kásibı dombyrashy Baqytbek Zeınelov, Mıras pen Quralaı Bekjanovtar, Medet pen Klara, Marat Áıtimov, Oral-Qosaı Baıseńgir-Nurgúl Tilegenova, Allabergen Jaqsybaev, Rıta Rım, Araılym Raqymqyzy, Juldyz Nurqasymova, jas, talantty ánshiler Farıda Joldasova, Sezim Oralqyzy jáne Ǵ.Jubanov atyndaǵy oblystyq fılarmonııanyń basqa da ánshileri óner kórsetti.
QR Eńbek sińirgen qaıratkeri, tanymal ánshi Araılym Raqymqyzy –keshtiń uıymdastyrýshysy prodıýseri, sheber úılestirýshisi retinde jarqyrap kórindi. Sahnanyń bezendirilýi, ssenarııi, júrgizýshiler zor talǵammen tańdalǵan. Esti ándi, ásem áýendi tyńdaǵysy kelgen astanalyqtar, kesh qonaqtary zaldyń ǵajaıyp atmosferasynan shyǵa almaı, ár án bitkende uzaq qol shapalaqtaýmen boldy. Keremet áser syılady.
Kesh shymyldyǵy Dýlat pen Rıtanyń oryndaýynda sózin Oral-Qosaı Baıseńgir jazǵan Dýlat Aıtjanovtyń «Aqtóbe-qutty mekenim» ánimen bastaldy. Áýezdi áýendi jarqyraǵan ALEM bı teatry árlep, myń buralǵan bıimen aıshyqtaı tústi.
Mıras pen Quralaı Bekjanovtar patrıottyq rýhtaǵy «Jasa, Qazaqstan!» ánimen sahnaǵa Saǵadat Nurmaǵambetov atyndaǵy áskerı kolledjdiń 22 kadetimen birge juldyzdaı jarqyrap shyqty. Keremet án rýhymyzdy kóterip, ǵajap án júrekterde jattaldy. Kvartet bolyp oryndalǵan «Raýshan gúlim» áni júregimizdi shym-shym qozǵap, saǵynyshymyzdy mazdatty. Keshti qorytyndylaǵan alty ánshi oryndaǵan «Álııa-dastan» áni aqtóbelikterdiń ǵana emes, bar qazaqtyń rýhyn kóterip, abyroıyn aspandatatyn ánge aınaldy.
Dýlat Aıtjanov – aǵaıyndy Jubanovtardy, Aıtbaevtardy, qazaǵymnyń talaı myqtysyn dúnıege ákelgen qasıetti Muǵaljar óńiriniń týmasy. Ánderi kóbine lırıkalyq baǵytta bolyp keledi.
«Dýlattyń ánderi naǵyz mahabbatty, elge, anaǵa, jarǵa degen ádemi sezimderdi sýretteıdi. Onyń keń taraǵan «Saǵynysh sazy» áni stýdent jastardyń ánuranyna aınaldy. Sońǵy kezde Dýlattyń orys tilinde jazylǵan ánderi de el aıasynan asyp, kórshiles elderde shyrqalyp júr», deıdi QR eńbek sińirgen qaıratkeri Svetlana Aıtbaeva.
Dýlattyń ánderi júrekterdi terbeıdi. Júrekten shyqqan áýen júrekterge jetetini ámbege aıan. Úlken de, kishi de onyń syrly sazǵa toly ánderin súıip aıtady. Qazirgi jastardyń tyńdaıtyn áýenderi basqasha, Dýlat Aıtjanov sonaý erteden kele jatqan dástúrli baǵytty, klassıkalyq týyndylardyń tórge ozǵanyn qalaıtyn óner ıesi. Búginde ol Aqtóbe qalasyndaǵy Ǵ.Jubanova atyndaǵy oblystyq fılarmonııada mýzyka kórkemdeýshisi retinde qyzmet atqarady. Fılarmonııa ánshileriniń ánderin kórkemdep, aranjırovkasyn jasaıdy. Jaqsy sóz, ǵajap óleń kórse, ádemi tabıǵatty sezinse, elge, anaǵa, jarǵa, perzentke degen mahabbat áýen bolyp kómeıine oralady, kópshilikke án bolyp jetedi.
Búginde kıeli sahnada Dýlattyń ánderi jıi oryndalady. Kezinde Nurlan men Murattyń repertýaryndaǵy Dýlattyń «Aýylǵa» degen ánin, «Zaman» tobynyń oryndaýyndaǵy «Ǵashyqpyn» ánin tyńdarman yqylaspen qabyldady. Búginde onyń shyǵarmalaryn Ulyqpan Joldasov, Qanat-Svetlana Aıtbaevtar, Mıras-Quralaı Bekjanovtar, Tamara Asar sııaqty tanymal óner juldyzdary oryndap júr.
Dýlat Aıtjanov Astana týraly, Aqtóbe jaıly birneshe ánniń avtory. Búginde onyń «Nurly Astana» (sózin aqyn Ońtalap Bazaralyniki), «Án-Astana» (sózi Talant Arǵynǵalıdiki) ánderin belgili ánshiler Marat Áıtimov, Juldyz Nurqasymova, jas ánshiler Aıbat Mahashov pen Aqtorǵyn Ámınovalar oryndap júr. «Án-Astana» áni oblystyq «Ánim sensiń — Astana» án baıqaýynda «Eń úzdik án» nomınasııasyna ıe bolǵan.
Ǵ.Jubanova atyndaǵy Aqtóbe oblystyq fılarmonııasynyń solısi Aıbat Mahashov Dýlattyń «Nurly Astana» ánimen birge, Talǵat Tileýlesovtiń sózine jazylǵan Nurtalap Júsipovtiń «Ǵajap Astana» ánin de úlken sahnalarda jıi oryndalatyn áýezdi áýenderdiń biri.
Dýlattyń kompozıtorlyǵy bir bólek, ánshiligi bir bólek dúnıe. Ánshi jary Rıtamen birge qol ustasyp, qazaqtyń tamasha ánderin úlken sahnalarda shyrqap, halyqtyń súıispenshiligine bólenip júrgen óner maıtalmandary. Tárbıeli ul, qylyqty qyz ósirip otyrǵan ónegeli otbasynyń ıeleri. Mundaıda dostyq tilekpen, janashyr kórermenniń lebizimen «Ániń de, sániń de, ómir jolyndaǵy dastanyń da taýsylmasyn, jaqsy áýenderiń qazaǵymnyń aspanynda áýeleı bersin!» degen tilek aıtqymyz keledi.
Gúlshat SAPARQYZY
