Jınaqtyń tusaýkeserine elimizdiń zııaly qaýym ókilderi, Senat depýtattary, joǵary oqý oryndarynyń rektorlary, mádenıet jáne ádebıet qaıratkerleri, ǵylym salasynyń jetekshi mamandary qatysty.
Is-sharany júrgizgen Memlekettik syılyqtyń laýreaty Nurlan Orazalın jańa kitaptyń qurylymdyq erekshelikterine, avtordyń ómirlik tájirıbesine jáne eńbektiń qoǵamdyq mańyzdylyǵyna toqtalyp, shyǵarmanyń táýelsizdik jyldary men el damýynyń kúrdeli kezeńderin túsinýde qundy derek ekenin atap ótti. Moderator retinde ol oqyrmanǵa kitaptyń negizgi ıdeıalaryn, mazmundyq salmaǵyn jáne avtordyń azamattyq ustanymyn tanystyrýǵa basymdyq berdi.
Oqyrmanǵa jol tartqan "Taıtalas-taǵdyr" eńbegi – bir adamnyń qyzmet jolyn baıandaýmen shektelmeıtin, elimizdiń táýelsizdik kezeńindegi áleýmettik, saıası jáne rýhanı ózgeristerdiń úderisin kórsetetin keń tynysty shyǵarma. Avtor uzaq jyldar boıy túrli memlekettik jáne qoǵamdyq mindetterdi atqara júrip kórgen oqıǵalaryn, eldik múdde jolyndaǵy kúrdeli sheshimder men jaýapkershilik sátterin, qoǵamdaǵy ózgeristerdi óz kózqarasymen jetkizedi. Zamandas tulǵalarmen pikir almasýlary, túrli tarıhı kezeńderdegi qyzmettik tájirıbeleri jáne sol ýaqyttyń qoǵamdyq ahýaly kitaptyń negizgi arqaýyn quraıdy.
Avtor ulttyq qundylyqtar, azamattyq jaýapkershilik, memlekettik qyzmet mádenıeti, bilim men ǵylym salasynyń mańyzy sekildi máselelerdi taldap, olardy qazirgi zamanmen baılanystyra paıymdaǵan.
Tusaýkeserge qatysqan zııaly qaýym ókilderi eńbektiń tarıhı-tanymdyq jáne tárbıelik mańyzyna nazar aýdaryp, onyń táýelsizdik jyldaryndaǵy mańyzdy kezeńderdi zerdeleýge jol ashatynyn atap ótti.
Kitapta baıandalǵan oqıǵalar men oı-tolǵamdar jas býynǵa, bolashaq zertteýshilerge jáne jalpy ulttyq tarıhqa qyzyǵýshylyq tanytatyn oqyrmanǵa qundy derekkóz bola alatyny aıtyldy.
«Taıtalas-taǵdyr» – tarıhshylar men saıasattanýshylarǵa, qoǵamtanýshylarǵa, mádenıettanýshylarǵa, bilim berý salasynyń ókilderine, sondaı-aq el damýy men rýhanı órleýine qyzyǵýshylyq bildiretin keń aýdıtorııaǵa arnalǵan eńbek. Shyǵarmada jeke taǵdyrdyń eldik damý jolymen astasýy, qoǵamdyq oıdyń qalyptasýyna áser etken kezeńder men tulǵalar týraly paıymdar kórinis tapqan», deıdi is-sharaǵa kelgen ǵalymdar.
El damýynyń negizgi kezeńderin túsinýge múmkindik beretin derektik ári kórkem-pýblısıstıkalyq eńbek táýelsizdik dáýiriniń saıası, áleýmettik jáne rýhanı úderisterin saralaýda mańyzdy ról atqarady. Kitap oqyrmanyn oılanýǵa, ótkenge jańasha kózqaraspen qaraýǵa jáne bolashaqqa syndarly jaýapkershilikpen oı túıýge shaqyrady.
