Mektep aýlasynda uıymdastyrylǵan «Mektebim – meıirim mekeni» atty is-shara aıasynda talaı jandy bilimge jetelep, shákirtteriniń júreginen oryn alǵan qos ardager ustazdy máńgilik este qaldyrýǵa arnalǵan kabınetter ashyldy. Bul bastama demeýshisi uldary, Almaty oblysyndaǵy Jambyl, Qarasaı aýdandarynda elge qyzmet etip, búginde qurmet tórinen kórinip júrgen Janjigit, Nurjigit Júsipovter eken. Olar kabınetterdi oqý úderisine tıimdi etip tolyq jabdyqtap beripti. Eki synyp ta shákirtterdiń qazaq tili men ádebıetinen, matematıkadan tereń bilim alýyna qajetti kórnekilikter, ádebı, pándik kitaptarmen, ınteraktıvti taqtamen, taǵy basqa qajettiliktermen tolyqtyryldy.
Mektep dırektory Tórebaı Shermahanovtyń aıtýynsha, 800 bala bilim alatyn mektepte ótken oqý jylynda jalpy bilim beretin pánder boıynsha aýdandyq olımpıadaǵa qatysqan alty oqýshy jeńiske jetse, «Daryn» ǵylymı jobalar baıqaýynda 4 oqýshy, «Zerde» básekesinde 17 shákirt júldeli oryndarǵa qol jetkizgen.
«Búgin lentasy saltanatty túrde qıylyp, paıdalanýǵa beriletin eki synyp kabınetteri bizdiń maqtanyshymyz bolǵan qos ustazdyń atymen atalyp otyr. Surapyl soǵys jyldarynda jalyndy jeńisti jaqyndatqan Baıjigit aqsaqal kóp jyl osy mektepte basshy boldy. Qatarlastary men shákirtteri qazaq tili men ádebıetinen dáris bergen ustazdyń rýhanı jan dúnıesi baı, eńbekqor azamat bolǵanyn keıingige úlgi qylyp aıtady. Marqum Almash apaı da úıindegi balalar tárbıesinen bólek ǵylym men tehnıka salasyna alǵashqy baspaldaq sanalatyn matematıka pánin shákirt zeıinine jetkizip, qanshama ul-qyzdyń jolyna shyraq jaqty. Kabınetter keremet jabdyqtaldy, zamanaýı ınteraktıvti taqta, teledıdar jáne basqa da kórnekilikterge balalar erekshe qýandy. Ata-analaryna osyndaı qurmet kórsetken Júsipovter áýletine alǵys aıtamyz», dedi mektep dırektory.
Bul bastamanyń jas urpaqtyń tárbıesine tıgizer áseri ushan-teńiz. Júzdegen jasty bilim soqpaǵyna bastaǵan qos ardagerdiń rýhyna arnalǵan sharaǵa búginde zeınettegi ata-analar men ustazdar, marqumdardan bilim alǵan shákirtter jınalyp, syı-qurmetke bólendi. Synyp kabınetteriniń ashylýynda ardager ustaz Tastaıbek Imanǵalıev, mektep dırektorynyń tárbıe isi jónindegi orynbasarlary Aıbek Turymbetov, Aıgúl Jarmanova, uıymdastyrýshy pedagog Nurqash Meırambek jáne qazaq tili men ádebıeti, matematıka pánderi birlestiginiń ustazdary erekshe belsendilik tanytyp, jaqsy istiń uıytqysy boldy.
Saltanatty jıynda ardager ustazdardyń uly, Jambyl aýdanynda halyqty tabıǵı gazben qamtyp, el alǵysyn arqalaǵan azamat Janjigit Baıjigituly tebirene sóıledi.
«Bizdiń kindik qanymyz osy ólkede tamyp, osy mektepte bilim aldyq. Ata-anamyz ustaz boldy. «Mektep tártibin buzýǵa, jaman oqýǵa bolmaıdy. Eger senderdiń qylyqtaryń durys bolmasa, biz qalaı qalǵan oqýshylardan úlgili bolýdy talap etemiz. Demek, betegeden bıik, jýsannan alasa bolyńdar, tek úzdik oqýlaryń kerek» deıtin áke aqyly aldaǵy jolymyzdan aınytpas maqsat boldy. Men ózim qurylys salasynyń mamanymyn. Keıingi jyldary aqyndar men batyrlar mekeni – Jambyl aýdanynda gaz sharýashylyǵynda, qurylysta da ter tóktim. Qazir anamnyń esimimen atalatyn «Jańa Almash aýyly» meıramhanasynda tutynýshylarǵa qyzmet kórsetip kelemin. Anam ómirden erte ótti, biz áke meıirimine shomyldyq, tabandylyǵyn kórip talpyndyq. Búgin sol áziz jandardyń rýhyna qurmet kórsetken sharaǵa jınalǵan barsha qaýymǵa, mektep ujymyna alǵysymyz sheksiz», dedi.
Osy kúni mektepte eki kabınettiń barlyq jabdyǵynan bólek eki ınteraktıvtik taqta, jasandy gazon tartý etildi. Osylaısha, qos ustazǵa degen urpaqtar qurmeti mektep ujymy úshin úlken syı boldy.
Qyzylorda oblysy,
Qazaly aýdany
