Merekelik jıyndy Mádenıet jáne aqparat mınıstrligi Aqparat komıtetiniń tóraǵasy Álisher Muqajan quttyqtaý sózimen ashty. Ol ujymnyń aqparat aıdynyndaǵy eńbegin joǵary baǵalaıtynyn jetkizdi. Sonymen qatar «Qazcontent» AQ basqarma tóraǵasynyń orynbasary Serǵalı Balajan sóz sóılep, ataýly kúnniń mańyzyna aıyryqsha toqtaldy.
Mereıtoıǵa portal ashylǵan kúnnen bastap eńbek etip, onyń negizin qalaǵan qyzmetkerler arnaıy shaqyryldy. Olar 15 jyldyq tarıhtyń eń qyzyq ári kúrdeli sátterin eske alyp, izgi tilekterin jetkizdi. BAQ.kz portalynyń alǵashqy bas redaktory Qambar Ahmetov aqparattyq saıttyń damýyna úles qosqan áriptesterine alǵys bildire otyryp, ujymdy quttyqtady.
– Alǵash qurylǵan kezeńder esimizde. Biz munda qyzmet ete bastaǵan kezde, 2000 jyldardyń basyndaǵy málimetterdi jıi qarap otyratynbyz. Keshe ǵana sol derekterge qaıta kóz júgirtsek, ol ýaqytta elimizde shamamen 2 700-ge jýyq buqaralyq aqparat quraly bolǵan eken. Sonyń bar bolǵany 19 paıyzy qazaq tilinde jumys istepti. Al 2011 jyly elimizde 6 800-ge jýyq saıt tirkelgen bolsa, onyń ishinde 617-si ǵana qazaq tilindegi resýrs bolǵan. Bul – qazaq ınternetiniń eń kúrdeli kezeńderiniń biri edi. Osyndaı jaǵdaıda memlekettiń mańyzdy qadamynyń biri – BAQ.KZ aqparattyq portalyn ashý boldy.
Alǵashqy jyldary oblystyq jáne aýdandyq gazet-jýrnaldarǵa arnap ınternet paraqshalaryn qurý isin qolǵa aldy. 2015 jylǵa deıin aımaqtyq basylymdardyń 270-ten astam onlaın nusqasy osy bastama aıasynda iske qosyldy. Portaldyń ıdeıasy men tujyrymdamasyn daıyndaýǵa sol kezdegi áriptesterimiz úlken eńbek sińirdi. Men redaktor bolyp kelgen kezde bólmede bir qyzmetker men bir kompıýter ǵana bolatyn. Keıin birtindep komanda qalyptasyp, tehnıka da túgeldendi, – dedi ol.
Sondaı-aq Qambar Ahmetov ujymǵa «Qazaq gazetteri» JShS tóraǵasy Dıhan Qamzabekulynyń arnaıy quttyqtaýyn jetkizdi. Túrli mınıstrlikterdiń ókilderi de BAQ.KZ ujymyna eleýli eńbegi úshin mınıstrleriniń arnaıy quttyqtaýyn jetkizdi. Olar portaldyń qazaq tilindegi aqparattyq keńistikti damytýdaǵy rólin atap ótip, ujymǵa aldaǵy jumysta da tabys tiledi.
Portaldyń alǵashqy úılestirýshi mamany – Jazıra Maratqyzy. Ol saıttyń eń alǵashqy qurylymyn rettep, aımaqtarmen baılanys ornatqan negizgi maman bolǵan. Jazıra Maratqyzy sol kezeńde qazaq tilindegi kontentti júıeleý, redaksııa jumysyn jolǵa qoıý jáne portaldyń kúndelikti jumysyn baqylaý syndy jaýapty mindetterdiń basy-qasynda júrgen. Shaǵyn komandamen bastalǵan jumysqa janyn salyp, agenttiktiń qalyptasýyna úlken úles qosqan.
– Alǵashqy jyldary biz agregator rólin atqardyq: qazaq tilinde shyqqan barlyq jańalyqty, maqalany, aqparatty bir jerge jınap, oqyrmanǵa usynýǵa tyrystyq. Ol úshin aımaqtyq gazet-jýrnaldarǵa kómek kórsetip, olardy ınternetke shyǵarý isin qolǵa aldyq. Eń basynda saıtqa kún saıyn shamamen myń adam kiretin. Bul biz úshin úlken kórsetkish edi. Tańerteń jumysqa kelgende eń birinshi reıtıngti qarap, qansha adam saıtqa kirgenin tekseretinbiz. Jarty jyl ótpeı, bul kórsetkish 10 myńǵa jýyq boldy. Qazaqsha kontentke degen suranystyń bar ekenin sol kezde anyq sezindik, – dedi ol.
BAQ.KZ portalyn qalyptastyrýdyń alǵashqy tehnıkalyq kezeńi de ońaı bolmaǵan. Qazaq ınterneti endi ǵana aıaqtanyp kele jatqan ýaqytta, portaldyń jumysyn jolǵa qoıý úshin kásibı IT mamandardyń tabandy eńbegi qajet boldy. Sol jaýapkershilikti moınyna alǵan maman – Arshat Oraz. Ol BAQ.KZ-diń tehnıkalyq qurylymyn jasap, portaldyń turaqty ári qaýipsiz jumys isteýine negiz qalaǵan.
– Sol kezdegi Baılanys jáne aqparat mınıstri Asqar Jumaǵalıev bolatyn. Ol maǵan arnaıy habarlasyp, qazaqsha aqparattyq platforma jasaý kerektigin aıtty. Portal 2010 jyly qurylǵan kezde qazaq tilinde aqparat taratatyn saıttar óte az boldy. BAQ.KZ sol ýaqyttan bastap ınternet jýrnalıstıkasynyń jetekshi kúshine aınaldy deýge bolady. Qazaqsha jańalyq jazatyn basqa saıttar bolǵanymen, kópshiligi úlgi retinde BAQ.KZ-dy qarap, taqyryp qoıý stılin, sýret ornalastyrý tásilin, kontentti berý formatyn úırenetin edi, – dedi ol.
«Baq.kz» aqparat agenttiginiń bas redaktory Móldir Baqbergenova qazir jańa formattarǵa beıimdelip, kóptildi kontentti damytý, jasandy ıntellekt tehnologııalaryn engizý, jedeldik pen sapany qatar ustaý baǵytynda aýqymdy jumys júrgizip jatqandyǵyn atap ótti.
– 15 jyldyqqa jańa jobalarmen qadam bastyq. Eń úlken jańalyqtyń biri – 2025 jyldyń mamyrynda orys tildi jańalyqtar lentasynyń qosylýy. Buǵan deıin agenttik tek qazaq tilinde aqparat taratyp kelgen bolatyn. Qazirgi tehnologııalyq kezeńde BAQ.KZ jasandy ıntellektini alǵash ıgergen medıa resýrstardyń qatarynda. Qazaq jáne orys redaksııalarynyń tilshileri áriptesterine medıa-trenıngter ótkizip, tájirıbesin bólisip júr,– dedi agenttik basshysy.
Sonymen qatar «Qazcontent» AQ basqarma tóraǵasynyń orynbasary Serǵalı Abaıuly aqparat agenttiginiń aldaǵy ýaqytta aǵylshyn tilinde de aqparat taratý jospary bar ekenin atap ótti.
Is-shara sońynda BAQ.KZ aqparat agenttigi qalyptasý kezeńderi týraly arnaıy derekti fılm kórsetildi. Onda alǵashqy jyldary atqarylǵan jumys, tehnıkalyq jáne shyǵarmashylyq qıyndyqtar, portaldyń búgingi deńgeıge deıingi ósý joly, qazirgi jumysy kórinis tapty. Sondaı-aq agenttiktiń damýyna úles qosqan mamandarǵa arnaıy marapat tabystaldy.
