Atalǵan medısınalyq ǵylymı-zertteý ınstıtýty CRT-P Amvia Sky qurylǵysyn ornata otyryp, júrekti fızıologııalyq stımýlıasııalaý jónindegi master-klasyn qosa atqardy. Atalǵan qurylǵy kádimgi standartty kardıostımýlıatorlardan júrek yrǵaǵy ózgergishtigi tabıǵı yrǵaqqa barynsha uqsastyǵymen aıryqshalanady.
Eki naýqasqa da operasııany arıtmologııa qyzmetiniń aǵa ordınatory Asylhan Parımbekov Polshanyń Krakov qalasynan kelgen professor Kshıshtof Bochardyń qatysýymen jasady.
AV-blokadadan keıin, júreksheler ablıasııasy men kardıohırýrgııalyq aralasýlardy ótkergen, júrek qarynshalarynyń jıyrylý birkelkiligi buzylyp, júrek qyzmeti jetkiliksizdigi, sol jaq qarynshanyń jıyrylý fraksııasy tómendegen jaǵdaıda pasıentterge arnaıy úsh kameraly kardıostımýlıatorlar (CRT-P) qajet.
Master-klasqa qatysqan hırýrýgtar kardıoresınhrondaý terapııasy qaǵıdattarymen tanysty. Bul terapııanyń klınıkalyq tájirıbede qoldanylýy, júrektiń ótkizgishtik júıesi aımaǵyna ımplantasııa jasaý kórsetildi.
«Master-klastar mamandarymyzdyń medısınanyń sońǵy jetistikterinen habardar bolýyna, jańa emdeý ádisteri men tehnologııalardy meńgerip, kórsetiletin medısınalyq kómektiń sapasyn arttyryp, kásibı ósýine múmkindik beredi. Tájirıbe almasý dárigerlerdiń kásibı qyzmetke qajetti bilimderin, biliktilik pen daǵdylaryn jetildirýge yqpal etedi», – deıdi ınstıtýttyń Basqarma tóraǵasy Rústem Tóleýtaev.
Asylhan Búrkitbaıulynyń aıtýynsha, úsh kameraly CRT-P kardıostımýlıatorlary qarynshalardyń sınhrondy jumysyn qamtamasyz etip, júrektiń qan aıdaý qyzmet men úzdiksiz jumysyn jaqsartady. Kardıoresınhrondaý terapııasy júrek qyzmetiniń jetkiliksizdigin emdeýdiń mańyzdy komponenti bolyp qala beredi, al úsh kameraly qurylǵylardy qoldaný uzaq merzimdi klınıkalyq nátıjelerdi jaqsartady.
«Júrektiń ótkizgishtik júıesine baǵyttalǵan CRT-P ımplantasııasy júrek qyzmeti jetkiliksizdigi bar naýqastarda uzaq merzimdi nátıjelerdi jaqsartýǵa jańa múmkindik ashady», – deıdi Júrek yrǵaǵy men ótkizgishtigi buzylystary bólimshesiniń meńgerýshisi Baǵdat Ahyt.
Sonymen eki operasııa da sátti ótti. Endi ozyq kardıostımýlıator ornatylǵan naýqastar el qatarly ómir súrip, qalaǵan isimen, sportpen aınalysyp, saıahattaı alady.
