Foto: Ashyq derekkóz
Qaryz alýshyǵa qosymsha ýaqyt berildi
Buǵan deıin onlaın-qaryzdar birer mınýtta rásimdelip, adamdar kóbine oılanyp úlgermeı nesıe alyp qoıatyn. Jańa tetik dál osy táýekeldi azaıtýǵa baǵyttalǵan. «Sheshim qabyldaý kezeńi» kúmándanǵan nemese qysym kórgen azamatqa oılanýǵa múmkindik beredi. Qaryz alýshylar osy ýaqyt ishinde usynysty qaıta zerdelep, qajet dep sanamasa, nesıe rásimdeýden bas tarta alady.
«Sheshim qabyldaý kezeńiniń» merzimi qaryz kólemine baılanysty belgilengen:
- 150-255 AEK aralyǵyndaǵy qaryzdar úshin – keminde 8 saǵat;
- 255 AEK-ten joǵary qaryzdar men 75 AEK-ten asatyn onlaın-mıkrokredıtter úshin – keminde 24 saǵat.
- Osy ýaqyt aıaqtalǵan soń ǵana qaryz alýshy eGov portaly arqyly nemese kredıtorǵa habarlaý tásilderimen óziniń nıetin qaıta rastaýy qajet. Eger rastamasa, shart kúshin joıady jáne aqsha aýdarylmaıdy.
Jańa tártip tek onlaın kepilsiz tutynýshylyq qaryzdarǵa qatysty
Ol taýarlyq kredıtterge, 150 AEK-ten aspaıtyn kredıttik kartalarǵa jáne sol uıym ishindegi qaıta qarjylandyrýǵa qoldanylmaıdy. Eger qaryz alýshy bir kúnde birneshe onlaın-qaryz rásimdep, jalpy somasy shekti mejeden asyp ketse, kútý kezeńi mindetti túrde engiziledi. Al, shuǵyl aqsha kerek bolsa, bank nemese MQU keńsesine baryp rásimdeý múmkindigi bar. Bul rette ótinimderge talap qoıylmaıdy.
Nesıe naryǵyna qalaı áser etedi?
Jańa talap azamattardy alaıaqtyqtan qorǵaýǵa, asyǵys sheshimderdiń aldyn alýǵa jáne qarjylyq jaýapkershilikti arttyrýǵa baǵyttalǵan. Sonymen birge bankter endi tólem kalkýlıatorlaryn ashyq ornalastyryp, qaryz tolyq ótelgen soń bereshektiń joq ekenin rastaıtyn anyqtama berýge mindetteledi. Onlaın-qaryzdar burynǵydaı «jedel» berilmeıtindikten, ımpýlsıvti ótinimder azaıyp, jalpy nesıe kólemi birshama tómendeýi múmkin. Aqsha shotqa 8-24 saǵattan keıin túsedi.
