Foto: istockphoto.com
Úkimet basshysy otandyq farmasevtıka salasyna ınvestısııa tartý úshin jańa kelisimder jasalyp jatqanyn, sondaı-aq, dárilik zattar men medısınalyq buıymdar óndirisine qatysty 9 ınvestısııalyq joba qolǵa alynǵanyn atap ótti. Densaýlyq saqtaý mınıstrligi úsh aı ishinde barlyq uıymdastyrý sharalaryn aıaqtap, ınvestorlarmen kelisimderge qol qoıýdy qamtamasyz etýi tıis.
«Dári-dármekke baǵa belgileýdiń jańa sıfrlyq júıesi farmasevtıkalyq naryqtaǵy barlyq qatysýshylar úshin biryńǵaı erejelerdi bekitti. Bıyl preparattarǵa baǵany tómendetýdiń arqasynda memleket dárilerdi satyp alýda 36 mlrd teńgeden astam qarjy únemdedi. Bul qarajat halyqty qosymsha dári-dármekpen qamtamasyz etýge baǵyttalady», dedi Oljas Bektenov.Sonymen qatar, Premer-mınıstrdiń aıtýynsha, satyp alý baǵalarynyń tómendeýi óndirýshiler men jetkizýshilerge unaı bermeıtini túsinikti.
«Biraq biz azamattarymyzdyń múddelerin basshylyqqa alýymyz kerek. Dáriler ádil baǵamen satyp alynady. Otandyq farmasevtıkalyq óndirýshilerge aıtarym, biz Sizderdi ári qaraı da qoldaımyz. Oǵan eshqandaı kúmán bolmasyn. Biraq memlekettik qoldaý sharalary sapaly medısınalyq ónimdi jetkizetin jáne baǵany jasandy túrde ósirmeıtin naryqtyń adal qatysýshylaryna ǵana kórsetiledi», dedi Premer-mınıstr.
Densaýlyq saqtaý mınıstri Aqmaral Álnazarova 2026 jylǵa arnalǵan preparattardy satyp alý jańartylǵan júıe boıynsha júrgizilip jatqanyn málimdedi.
«Dári-dármekterdiń keń tiziminiń qunyn tómendetý nátıjesinde aıtarlyqtaı bıýdjettik tıimdilikke qol jetkizilgen. Birqatar joǵary shyǵyndy dárilik zattar boıynsha baǵalar 50%-dan 300%-ǵa deıin tómendedi. Bul, eń aldymen, onkologııalyq preparattarǵa qatysty. Mysaly, Imatınıb dárisi boıynsha baǵa 9450 teńgeden 2348 teńgege tómendedi, al Bevasızýmab dárisiniń baǵasy 360 myńnan 77 myńǵa deıin tómendedi», delingen habarlamada.
Sonymen qatar antıbıotıkter men ımmýnobıologııalyq preparattar boıynsha da aıtarlyqtaı únem jasalǵan: Sefepımnen – 174 mln teńge, Ekýlızýmabtan – 424 mln teńge únemdelgen.
Eń joǵary bıýdjettik tıimdilikti qamtamasyz etetin TOP-10 preparatqa Bevasızýmab, Imatınıb, Sorafenıb jáne Sýnıtınıb sııaqty preparattar kirdi. Sondaı-aq Insýlın deglýdek, Metotreksat, Eltrombopag, Býdesonıd jáne Iopromıd baǵasy aıtarlyqtaı tómendedi.
Baǵa tómendeýi bólshek saýdaǵa da áser etti: 4 900 dári-dármekke jańa shekti baǵalar bekitilip, qazan-qarasha aılarynda tanymal preparattardyń quny orta eseppen 12%-ǵa arzandaǵan:
- «Sefaps» – 31%;
- «Zıtmak» – 20%;
- «Revmoksıkam» – 32% tómendegen.
Mınıstrliktiń málimetinshe, otandyq óndirýshiler jańa talaptarǵa tez beıimdelip, ónim baǵalaryn qaıta qaraǵan. Únemdelgen qarajat birinshi kezekte alǵash ret anyqtalǵan pasıentterdiń qajettilikterin óteýge baǵyttalady. Jańa baǵa belgileý modeli naryqty turaqtandyryp, jetkizý qaýipsizdigin kúsheıtedi jáne syrtqy baǵa aýytqýlaryna táýeldilikti azaıtady. Mınıstrlik osy baǵyttaǵy nátıjelerdi bekitý jumysyn jalǵastyrady.
