Foto: Ashyq derekkóz
«Sot-medısınalyq saraptama júrgizildi. Bul preparat pedıatrııalyq tájirıbede uzaq jyldan beri paıdalanylady. Búginge deıin medısınalyq uıymdardan onyń janama áserine qatysty resmı shaǵymdar túsken joq. Qazaqstanda tek túpnusqa ónimder ǵana qoldanylady», dedi Álnazarova Májilis kýlýarynda.
Mınıstr tergeý tolyq aıaqtalǵannan keıin ǵana naqty sheshim qabyldanatynyn atap ótti. Sonymen qatar eldegi stomatologııalyq uıymdarǵa tekserý júrgizilip jatqany belgili boldy.
Jyl basynan beri azamattar shaǵymy negizinde 160 klınıka tekserilgen. Bas prokýratýranyń tapsyrmasymen óńirlerdegi farmasevtıkalyq baqylaý departamentteri 620 stomatologııalyq uıymdy josparly tekserýge kiristi.
Esterińizge sala keteıik, ótken jyldyń kúzinde Astanadaǵy jeke stomatologııada 18 tisi birden emdelgen úsh jasar qyz narkozdan keıin oıanbaı kóz jumǵan edi. Qazir bul iske qatysty sot prosesi jalǵasyp jatyr. Anestezıolog dárigerge tórt jylǵa deıin bas bostandyǵynan aıyrý jazasy taǵaıyndalýy múmkin. Balanyń ata-anasy dárigerdi jáne klınıka basshylyǵyn da jaýapqa tartýdy talap etip otyr.
