Taekvondoshylar arasyndaǵy bıylǵy álemdik birinshilik Afrıkanyń injý-marjany sanalatyn Naırobıde uıymdastyryldy. Beıbarys Qabylan 87 keliden joǵary salmaq dárejesinde synǵa tústi. Jarystyń alǵashqy kúninen-aq onyń aıaqalysy erekshe ekeni ańǵaryldy. Alǵashqy aınalymdarda Úndistan men Túrkııa sportshylaryn senimdi túrde qapy qaldyryp, jartylaı fınalǵa joldama aldy.
Jartylaı fınalda Beıbarys Iran sportshysy Ashrafı Amırmohammadpen beldesti. Taekvondo áleminde Iran mektebi erekshe myqty sanalatyny belgili. Soǵan qaramastan, Beıbarys qarsylasynyń shabýyldaryn der kezinde toqtatyp, 2:1 esebimen jeńiske jetip, fınaldyń esigin aıqara ashty.
«Álemdik deńgeıdegi jarysta jeńiske jetý ońaı emes. Iran sportshysy myqty qarsylas boldy, biraq ár raýndta taktıkalyq josparyma saı qımyldap, jeńiske jettim. Endi aldaǵy maqsat – Qazaqstannyń kók týyn álemdik arenalarda bıikke kóterý», deıdi Beıbarys Qabylan.
Kez kelgen dodanyń fınalynda sportshynyń eń úlken umtylysy synalady. Bul kezeńde Beıbarysqa Ońtústik Koreıanyń ókili Iаn Chjýnıon qarsy turdy. Tartysty jekpe-jekte otandasymyz qarsylasynyń árbir qımylyn dál baqylap, sát saıyn tıimdi soqqylarmen basymdyqqa ıe boldy. Iаn Chjýnıon fınalda birneshe márte belsendi áreketterge kóshkenimen, Beıbarystyń qyraǵylyǵy men tehnıkalyq artyqshylyǵy sheshýshi ról atqardy. Aqyrynda, jarys nátıjesi bizdiń sportshynyń aıqyn basymdyǵymen aıaqtalyp, Qazaqstannyń aty álemdik taekvondo tarıhynda altyn árippen jazyldy.
