Halyq messendjerlerde belsendi túrde jaza bastady, al kóptegen adamdar, ásirese bıik úılerdiń turǵyndary, qaýipsizdik úshin dalaǵa shyqty. Jappaı evakýasııalaý júrip jatyr.
Qalalyqtardyń telefondarynda seısmıkalyq belsendilik týraly habarlamalar birden kelip túse bastaǵan, ártúrli aýdandarda adamdardyń dúmpýlerdi qalaı sezgeni týraly jazbalar paıda boldy.
Áleýmettik jelilerde ondaǵan foto men vıdeo jarııalandy: bireýler úıdegi terbelgen shamdardy túsirse, endi bireýler tótenshe jaǵdaı kezinde qosylatyn dabyl sırenalaryn vıdeoǵa túsirgen.
Mektep oqýshylary, keńse qyzmetkerleri jáne ortalyqtaǵy turǵyndar ýaqytsha ǵımarattardan shyǵyp, kóshede jınaldy. Kýágerlerdiń aıtýynsha, jaǵdaı tynysh bolǵan – adamdar uıymdasqan túrde áreket etip, qaýipsizdik sharalaryn saqtaǵan.
Eýropa-Jerorta teńizi seısmologııa ortalyǵynyń dereginshe, dúmpýler Qytaıdyń ońtústigindegi Shyńjań aımaǵynda bolǵan magnıtýdasy 6,1 jer silkinisimen baılanysty.
Almatydaǵy eseptik qarqyndylyq 3 balldy quraǵan.
«Epısentr Almatydan ońtústik-shyǵysqa qaraı 277 shaqyrym jerde, Qytaı aýmaǵynda ornalasqan. Epısentr koordınattary: 41.021° s.e., 78.387° sh.b. Tereńdigi – 5 kılometr. Magnıtýda MPV – 6,7», dep habarlady TJM.
