Foto: Ashyq derekkóz
Bul úrdis munaı baǵasynyń barreline 60 dollardan joǵary saqtalýy, AQSh Federaldy rezerv júıesiniń mólsherlemeni tómendetý sıkline ótýi, sondaı-aq jahandyq dollar ındeksiniń 8,3%-ǵa álsireýi sııaqty syrtqy faktorlarmen baılanysty.
Damýshy elderdiń valıýtalary da jyl basynan beri orta eseppen 8,3%-ǵa nyǵaıǵan, osynyń aıasynda Qazaqstan naryǵyna degen halyqaralyq ınvestorlardyń qyzyǵýshylyǵy artyp otyr.
«Inflıasııalyq qysymdy tómendetýge jáne makroekonomıkalyq ortanyń boljamdy bolýyn eseleýge baǵyttalǵan Úkimet pen Ulttyq banktiń úılesimdi saıasaty teńgeniń nyǵaıýyna aıtarlyqtaı úles qosty. Atap aıtqanda, Úkimet, Ulttyq bank jáne Agenttik 2026-2028 jyldarǵa arnalǵan makroekonomıkany turaqtandyrý jáne halyqtyń ál-aýqatyn arttyrý jónindegi Birlesken is-qımyl baǵdarlamasyn iske asyryp otyr. Atalǵan baǵdarlama suranys pen usynys arasyndaǵy teńgerimsizdikti joıýǵa, bıýdjet shyǵystarynyń tıimdiligin arttyrýǵa, mıkro jáne makroprýdensıaldy retteý sharalaryn iske asyrýǵa, halyqtyń naqty tabysyn ósirýge jáne ınflıasııany tómendetý men turaqtandyrý arqyly ornyqty ekonomıkalyq ósimge jaǵdaı jasaýǵa baǵyttalǵan», delingen málimdemede.
Ulttyq banktiń qatań ári dáıekti sheshimderi naryq senimin arttyryp, teńgedegi quraldardyń naqty kiristiligin kóbeıtti. Qazan aıynan qarasha aıyna deıin beırezıdentter Qazaqstannyń memlekettik baǵaly qaǵazdaryna 1,1 mıllıard dollar ınvestısııa quıdy. Osylaısha, jalpy ınvestısııa kólemi 3,6 mlrd dollarǵa jetti.
Bul Qarjy mınıstrligi úshin qaryz alý qunyn tómendetýge múmkindik berdi: jeltoqsanda 9 jyldyq MBQ 16,1% kiristilikpen ornalastyryldy (qazanda – 17,2%).
Ulttyq bank sheteldik ınvestorlardyń ósip kele jatqan valıýtalyq usynysy men syrtqy qolaıly ahýal teńge baǵamyna tikeleı áser etkenin atap ótti.
«Memlekettik baǵaly qaǵazdar naryǵynyń ınfraqurylymyn damytý boıynsha Ulttyq Banktiń júıeli jumysy – operasııalardyń ashyqtyǵyn arttyrý, kiristilik qısyǵyn qalyptastyrý, beırezıdentter úshin qoljetimdilik pen esep aıyrysý rásimderin jetildirý – naryqtyń sapaly negizin qalyptastyryp, sheteldik ınvestorlardyń qyzyǵýshylyǵyn qoldap otyr», delingen habarlamada.
Sonymen qatar qazirgi aıyrbas baǵamy dınamıkasy ekonomıkalyq saıasat sapasynyń jaqsarǵanyn jáne boljamdy makroorta qalyptasqanyn kórsetetini atap ótildi. Teńgemen baǵalanatyn quraldarǵa ınvestorlardyń senimi artqan.
Ulttyq bank erkin ózgermeli aıyrbas baǵamy rejıminiń saqtalatynyn jáne teńge baǵamynyń ekijaqty qalypty qubylýyna jol beriletinin málimdedi.
«Valıýta naryǵyndaǵy jaǵdaı turaqty baqylaýda. Qazirgi ýaqytta Ulttyq Bank alypsatarlyqqa qatysty belsendilikti jáne oǵan aralasýǵa ıtermeleıtin qandaı da bir faktorlardy baıqap otyrǵan joq», delingen resmı aqparatta.
Buǵan deıin sarapshylardyń teńge baǵamynyń kúsheıýin ishki naryqtaǵy usynystyń artýymen jáne syrtqy ekonomıkalyq faktorlarmen baılanystyryp otyrǵanyn jazǵan edik.
