Ýkraınadan is-tússiz ketken qazaq jaýyngeriniń jerlengen jeri tabyldy

ASTANA. 10 mamyr. Uly Otan soǵysyna attanyp, is-tússiz ketken qazaqstandyq jaýynger Aqan Toqbaevtyń taǵdyry 70 jyldan keıin belgili boldy. Izdeý ekspedısııasy kezinde onyń Ýkraınadaǵy Sýdılko aýylynda baýyrlastar zıratyna jerlengeni anyqtaldy. Bul týraly 24.kz habarlady. Osyǵan baılanysty jaýyngerdiń týystary onyń týǵan aýyly Shyǵys Qazaqstan oblysy, Úrjar aýdany, Aıtbaı aýylynda eske alý rásimin ótkizdi. Oǵan óńir turǵyndary qatysty. Aqan Toqbaev soǵysqa 1941 jyly ketken. Eki jyldan keıin onymen baılanys úzilgen. Al, týǵan-týystaryna Toqbaevtyń is-tússiz joǵalyp ketkeni týraly habar jetken. «Biz izdeý jumystaryn úzdiksiz júrgizdik. Osy maqsatta kóptegen jerlerge hat jazdyq. Nátıjesinde aǵamyz týraly derekke qol jetkizip otyrmyz. Bizge baýyrlastar zıratyndaǵy eski taqtanyń sýretin jiberdi. Onda aǵamyzdyń aty-jóni jazylǵan. Odan basqa da bul derekti naqtylaıtyn qujattar qolymyzǵa tıdi», – deıdi jaýyngerdiń qaryndasy Márzııa Aıtbaıqyzy. Sonymen qatar, Aqan atanyń týystary onyń ásker qataryna alynǵannan keıin Alataý taýyndaǵy áskerı bólimderdiń birinde daıyndyqtan ótkenin, sol jerden tikeleı jaý tylyna jiberilgenin anyqtaǵan. Týystarynyń aıtýynsha, Aqan Toqbaevty 208-shi dıvızııanyń bólim komandıri etip taǵaıyndaǵan. Aıtbaı aýylynda soǵysqa attanǵan 54 ardagerdiń qurmetine eskertkish taqta ornatylǵanyn aıta keteıik. Elaman Qońyr. Derek, sýret: 24.kz.