Foto: Sý resýrstary jáne ırrıgasııa mınıstrligi
Mamandardyń aıtýynsha, mehanıkalyq tazartý sý shyǵynyn azaıtyp, sýdyń alqaptarǵa toqtaýsyz jetýine múmkindik beredi. Tazartý sharalary qazan aıynda bastalyp, sýarý maýsymy bastalǵanǵa deıin tolyq aıaqtalýy tıis.
Aýyl eńbekkerleri uzaq jyldar kúttirgen bul jumystarǵa rızashylyq bildirgen. «Sulýtór» kanaly arqyly 120 gektardan asa jońyshqa alqaby sýarylatyn bolsa da, aryq sońǵy birneshe onjyldyq boıy jóndeý kórmegen. Sonyń kesirinen sý arnadan shyǵyp, kóp bóligi ysyrap bolǵan.
«Buryn aýyl turǵyndarymen jınalyp, aryqty taýǵa deıin kúrekpen tazalaıtynbyz. Odan beri qansha jyl ótti. Aryq bitelip, shóp ósip ketken edi. Sonyń saldarynan aýylǵa sý durys jetpeıtin. Mine qazir «Qazsýshardyń» Jambyl fılıaly aýdanymyzǵa tehnıka bólip, bir aptanyń ishinde aryqtardy tazalap berdi. Osy jumys úshin Sý resýrstary jáne ırrıgasııa mınıstrligi men fılıalǵa alǵys aıtamyn. Men 11 gektar jerge jońyshqa ektim. Sý esh kedergisiz ýaqytyly kelip tur. Buryn aryqqa shóp ósip, qoqystar jınalyp, bitelip qalǵan edi. Sonyń saldarynan sý jan-jaqqa aǵyp, ysyrap bolatyn. Endi kóktemnen beri sý jaqsy kelip tur», dedi «Sulýtór» sharýa qojalyǵynyń basshysy Nurǵalym Shaǵyrbaev.
Mınıstrlik bıyl «Qazsýshar» Jambyl fılıalyna 75 jańa tehnıka men avtokólik bergen. Olardyń qatarynda ekskavatorlar, júk tıegishter, traktorlar, sý tasymaldaýǵa arnalǵan kólikter, samosvaldar, avtokrandar, tirkemeler men ózge de arnaıy jabdyqtar bar.
