Sýret: interesnyefakty.org
«Shaqyryp jatyr» degen soń tula boıym tyz etip, qalam men qatyrma qaǵazymdy alyp bara qaldym.
Buryndary omalyp otyrǵan kúıi kóz astymen atyp, kirer-kirmesten aıtaryn zildeı zirkildeı jónelýshi edi... Ornynan turyp qol usynyp amandasty. Tize búgip otyrýymdy usyndy.
Janary jaıdary, qabaǵy ashyńqy, hal-jaǵdaıymdy surap ótken bolyp:
– Pyqeke, qıyndaý ýaqyt, qınap júrgen problemalaryńyz bolsa aıta otyryńyz, – deıdi.
Qapelimde sasyp qaldym.
– Shúkirshilik, el qatarly, bári durys, – dep mińgirlegen boldym.
– Qarajattan kómekteseıin, materıaldyq kómek surap ótinish jazyńyz, – degeninde tynysym bitelip, bir-eki ret oqys jótel eriksiz lyqsyp jóneldi.
...Úsh kún ótpeı basekeńniń aldynda taǵy otyrmyn.
– Sharshańqyrap júrgen bolarsyz, ujymymyzǵa bir joldama kelip qalǵan eken, aqyldasyp, sizge bereıin dep otyrmyz, – dedi...
...Bólmeme kelip, «Oıpyraı á, áneý kúngi kómegi anaý! Endi mynaýsy ne? Jaǵdaıdyń kúrt ózgergeni qalaı? Kóterile qoıǵan kókem de joq... Qyzmeti qyr asty deıtin qaıyn jurt ta typ-tıpyl... Túsinsem buıyrmasyn!» – dep oılanyp otyrmyn.
...Tegin joldamamen jonym jotalanyp, qaıta oralyp, shyrt túkirip qyzmetke kiriskenim sol, taǵy da basekeń kirip ketsin demesi bar ma.
Kibirtikteı qysyla kirip edim, qarsy júrip qolymdy alyp, «Jaqsylap tynyqtyńyz ba?» dep arqamnan qaqqan.
Otyryp úlgermeı:
– Múmkindik bolsa, el men jer aralaǵanǵa ne jetsin, daıyndalyńyz, muhıttyń arǵy jaǵalaýyna jolyńyz túseıin dep tur, – dedi.
«Al kerek bolsa! Apam da ań-tań, men de ań-tań... Urynyń arty qýys, qarap otyrmaı týys-týǵannyń «amandyǵyn» surap shyqtym. О́sken, órlegen biri joq, bári-bári quzyrly qyzmetten «din aman». Oıpyraı-á, batpan quıryq, aıdalada jatqan quıryq, túsinsem buıyrmasyn!..
...Jeldeı esip, jelken minip, shetelińnen shirene oralsam, áýejaıda bir top qyzmettester kútip tur...
Alǵashqyda oıǵa álbette jamanshylyq oralady emes pe... Jo-joq, qoldarynda gúldeste: «Qosh keldińiz, Pyqeke!» dep báriniń yrjalań-yrjalań etkeninen amandyqty sezip, traptan taltańdaı tústim.
Mássaǵan, bilgenim – ózim joqta qyzmetim ósip, basekeńe orynbasar bolyppyn.
...Túsinsem buıyrmasyn. Tún balasy «osynaý jaqsylyqtardyń» sheshýin taba almaı, shermende bop dóńbekship shyqtym.
Anany da oıladym, mynany da boljadym, biriniń qısyny kelmedi.
Aqyry sharshadym. Aınalaıyn kópshilik, sonda aıaq asty búıtip mártebemniń asyp-tasý sebep-saldaryn sizder sezseńizder, bilseńizder aıta qoıyńyzdarshy. Súıinshisine suraǵanyńyzdy alasyz.
Berik SADYR
