Sýret: inbusiness.kz
«Kreatıvtik óndiristerdi damytý qorynyń qurylýy mańyzdy kezeńderdiń biri boldy. Bul ınstıtýttyń negizgi fýnksııalary – talanttardy anyqtaý, jobalardy damytý jáne otandyq kreatıvtik ónimdi halyqaralyq naryqtarǵa ilgeriletý. Qordyń qyzmeti qarjylyq jáne qarjylyq emes qoldaý sharalaryn, sonyń ishinde granttar men konkýrstyq baǵdarlamalardy qamtıdy. Budan bólek, qordy qarjylandyrýǵa qatysty norma qabyldanyp, lotereıa bıletterin satý tabysynyń keminde 3%-y kreatıvtik ındýstrııalardy damytýǵa baǵyttalatyn boldy», deıdi Mádenıet jáne aqparat mınıstrliginiń baspasóz qyzmeti.
Sondaı-aq atalǵan vedomstvo 16 jasqa deıingi balalardyń onlaın-platformalarda tirkelýine tyıym salatyn zań jobasy ázirlengenin habarlady.
«Qoldanystaǵy zańnamaǵa engiziletin túzetýler toptamasy ázirge tek keń qoǵamdyq talqylaýǵa shyǵaryldy. Mınıstrlikke ata-analardan, muǵalimderden jáne qoǵamdyq uıymdardan kóptegen ótinish tústi. Olardyń suranystaryn eskere otyryp, biz halyqaralyq tájirıbeni zerdelep, sarapshylarmen konsýltasııalar júrgizdik. Sonyń nátıjesinde 16 jasqa tolmaǵan balalardyń onlaın-platformalarda tirkelýine tyıym salý normasyn engizý týraly sheshim qabyldandy. Bul tyıym messendjerlerge emes, tek áleýmettik jelilerge qoldanylady», deıdi baspasóz ókili.
Iá, áleýmettik jelilerdegi bul shekteý kámeletke tolmaǵandardyń qaýipsizdigin kúsheıtý, olardy zańǵa qaıshy kontentpen baılanys ornatý qaýpinen qorǵaý maqsatyn kózdeıdi. Eske salsaq, mundaı talaptar álemdik tájirıbede de bar. Máselen, Belgııa, Germanııa, Fransııa, Italııa elderinde balalar áleýmettik jelilerge ata-anasynyń kelisiminsiz tek 13-15 jastan bastap tirkele alady. Basqa barlyq jaǵdaıda tirkelý úshin ata-ananyń nemese qamqorshynyń ruqsaty qajet. Al álemde alǵashqy bolyp áleýmettik jelilerdi 16 jasqa deıingi balalarǵa paıdalanýǵa tyıym salý týraly sheshimdi jaqynda Aýstralııa memleketi qabyldady.
Budan bólek mınıstrlik ókili kıno, BAQ jáne onlaın-platformalardaǵy kontentti boıynsha tıisti usynystar aıtty.
«Máselen, kóptiń talqysyna túsip jatqan «Aýrý» fılmi bastapqyda prokattyq kýálik alý úshin fılmniń 18+ jas ereksheligin surady. Alaıda komıssııa bul fılmdi 21+ sanatyna jatqyzdy. Árıne, bul kınotýyndydaǵy kóptegen negizsiz zorlyq kórinisteriniń jáne de balaǵat sózderdi kóp paıdalanýyna baılanysty», dep málimdeıdi mınıstrlikten.
Eske salsaq, azamattyq qyzmetshilerdiń jalaqysyn arttyrý jónindegi tapsyrma Memleket basshysy tarapynan berilgen bolatyn. Mınıstrlik bul tapsyrmany oryndaýda tıisti jumys júrgizip jatyr. Atap aıtsaq, 2022–2025 jyldar aralyǵynda kitaphanashylardyń jalaqysy eki esege ósti.
«Búginde kitaphanashylardyń ortasha aılyǵy 150 myńnan 260 myń teńgege deıingi aralyqta, ol kitaphananyń deńgeıine, sanatyna, tájirıbesine jáne laýazymyna baılanysty», deıdi mınıstrlik ókili.
Árıne, aýyldyq jerlerde jumys isteıtin qyzmetkerlerge, sondaı-aq ekologııalyq apat aımaqtary men radıasııalyq qaýip aımaqtarynda eńbek etetinderge qosymsha tólemder qarastyrylǵan. Úkimet qaýlysyna sáıkes jergilikti atqarýshy organdar aýyldyq eldi mekenderde jumys isteıtin arhıv mamandaryna kótermelengen jalaqy bekite alady.
