Foto: Ashyq derekkóz
Buǵan deıin, 2024 jyldyń tamyzynda, Azamattyq avıasııa komıteti tikeleı reısti 2025 jyldyń sońynda ashý múmkin ekenin málimdegen edi. Alaıda jospar ózgerip, áýe qatynasy ázirge iske qosylǵan joq. Mınıstrdiń aıtýynsha, negizgi sebep – Boeing jáne Airbus konsernderiniń ushaq jetkizý merzimderiniń aıtarlyqtaı keshigýi.
Mınıstr Saýranbaevtyń sózinshe, mundaı qashyqtyqqa tikeleı ushý úshin jańa býyndaǵy dreamliner sekildi áýe laıneri qajet.
«AQSh baǵytyndaǵy reıs Soltústik polıýs arqyly ótedi, ıaǵnı biz Reseı aýmaǵyn kesip ótýimiz kerek. Bul baǵytqa arnaıy jańa dreamliner laıneri qajet. Birinshi kezekte ushaqtyń bolýy mańyzdy. Al qazirgi tańda Airbus jáne Boeing zaýyttarynyń tapsyrys portfeli 14 jylǵa deıin tolyp tur. Osyǵan baılanysty ushaqtardy jetkizý merzimi keıinge shegerilýde», dedi ol Úkimettegi brıfıngte.
Mınıstrdiń aıtýynsha, Qazaqstan kelesi jyly alýy tıis áýe kemeleri endi 2027 jyly ǵana jetkiziledi. Osy jaǵdaıǵa baılanysty Air Astana AQSh-qa qatynaý úshin aralyq nusqa usynǵan.
«Londonǵa toqtaý qarastyryldy. Jolaýshylar bort aýystyrmaıdy, Londonda tek tehnıkalyq qoný jasalyp, keıin ushaq AQSh-qa baǵyt alady. Dreamliner kelgenge deıin biz ázirge osyndaı marshrýtty paıdalanýymyz múmkin. Qazir osy baǵytty pysyqtap jatyrmyz», dep túıindedi Saýranbaev.
