Qyrkúıek aıynda oblystyq jastar saıasaty máseleleri jónindegi basqarma iske qosqan joba aýyldaǵy jasóspirimderge tek bilim emes, senim men múmkindiktiń jańa deńgeıin usyndy. Onlaın-daýys berý arqyly anyqtalǵan 13 kásibı mentor 2000-nan astam jasqa baǵdar kórsetip, 35 aýyldyq eldi mekendi aralady. Medısına, aýyl sharýashylyǵy, kásipkerlik, memlekettik qyzmet syndy salalardyń úzdikteri aýyl balasynyń esigin qaǵyp, olardyń arman-maqsatyna qulaq túrdi. Joba koordınatory Ázıza Kúlmettenova bul bastamanyń mánin bylaısha túsindirdi:
– Biz aýyldaǵy jastyń da bıikke umtylýǵa quqyǵy bar ekenin kórsetkimiz keldi. Aqparat tapshylyǵy seziletin ortada durys baǵyt berý – jas býynnyń taǵdyryn aıqyndaıtyn faktor, – deıdi ol.
Jobanyń eń jas qatysýshysy – Aqbel aýylynyń 13 jastaǵy bozbalasy Erasyl Aıbek. Boıynda týǵan jerine degen súıispenshilik pen eńbeksúıgishtik erekshe bilinetin jas talap fermer bolýdy armandaıdy.
– Aýylda qalyp, sharýashylyqty damytqym keledi. Bul joba bizdi jigerlendirdi, óz jolymdy anyqtaýyma kómektesti, – deıdi ol qýanyshymen bólisip.
Erasyldyń mentory, sharýa qojalyǵynyń basshysy Anar Bozaeva aýyl sharýashylyǵyn tek tabys kózi emes, ulttyń tiregi dep biledi.
– Erasyl – aýyldy shyn júregimen súıetin bala. Bolashaqta óz isiniń sheberi bolaryna senimdimin. Jastarǵa tek bilim emes, jiger berý mańyzdy, – deıdi tájirıbeli maman.
Joba aıasynda Dolınka kenti ákiminiń orynbasary Jasulan Hamıtov ta birneshe jasqa mentorlyq etti. Ol aýyl oqýshylarynyń boıynan ózgeshe umtylys baıqalǵanyn aıtady.
– Olardyń kózinde bolashaqqa degen senim bar. Bul – eń úlken nátıje. Aýyldan da kóshbasshylar shyǵady, tek múmkindik qajet, – deıdi ol.
Jasulan myrzanyń shákirti, 11-synyp oqýshysy Rýslan Qulmuhamedov jobadan keıin óz jolyn tapqanyn maqtanyshpen aıtady.
– Memlekettik qyzmettiń qyr-syryn kórip, ózimdi osy salada elestete bastadym. Adamdarǵa kómekteskim keledi. Bul – meniń tańdaǵan jolym, – deıdi bolashaq memlekettik qyzmetker.
Joba sońynda mentorlar men shákirtterdiń eńbegi qorytyndylanǵan úlken festıval ótti. Sahna tórinde mentorlarǵa «Ult maqtanyshy», shákirtterge «Ult úmiti» marapattary tabystaldy. Bul – olardyń eńbegine kórsetilgen qurmet qana emes, aýyl jastaryna degen qoǵamnyń senimi.
Úsh aı ishinde árbir jas óz bolashaq jolyn aıqyndap, mentorlarmen baılanysyn bekite tústi. Ár mentor shákirtterin aldaǵy ýaqytta da qoldaıtynyn, birge jańa jobalarǵa kirisetinin jetkizdi.
«Ult qazynasy» – aýyldyń tek ómir súrý ortasy emes, damýdyń da ortalyǵy bola alatynyn kórsetken joba retinde qundy. Bastama aýyl jastarynyń oı-órisin keńeıtip, týǵan jerinde qalsa da úlken bıikke jetýge bolatynyn dáleldedi. Jobanyń aıaqtalýy – bir kezeńniń túıini ǵana. Alaıda aýylǵa jetken úmittiń lebi, jastardyń boıynda oıanǵan senim óshpek emes. О́ıtkeni eldiń erteńi – búgin jol salyp jatqan osy jas býynnyń qolynda.
Qaraǵandy oblysy
