Foto: Ashyq derekkóz
«Búginde Qazaqstannyń medıa keńistiginde birneshe sot prosesi ótýine baılanysty talqy júrip jatyr. Mádenıet jáne aqparat mınıstrligi bul prosesterdi, sonyń ishinde Orda.kz pen QazTAG-qa qatysty isterdi erekshe nazarda ustap otyr. Biz úshin elimizde sóz bostandyǵynyń saqtalýy men barlyq aqparat taratyp otyrǵandardyń zań aıasynda jumys isteýi asa mańyzdy. Kásibı jýrnalıstıka adaldyqqa, obektıvtilikke jáne tekserilgen aqparattyń naqtylyǵyna negizdelýi kerek», dedi Aıda Balaeva.
Mınıstrdiń sózinshe, medıa qaýymdastyq kásibı jýrnalısterdiń quqyqtyq alańda qorǵalatynyn túsinýi tıis.
«Sebebi bul sóz bostandyǵy men zańdy jýrnalıstik qyzmet sekildi asa mańyzdy máselelerge tikeleı qatysty. Kásibı buqaralyq aqparat quraldary zańdy buzbaı jumys istegen jaǵdaıda ǵana memleket olardyń quqyǵyn tıimdi qorǵaı alatynyn túsinýi tıis. Al eger taraptar arasyndaǵy qatynastar quqyqtyq alańǵa aýyssa, memlekettik organnyń aralasýy sotqa qysym retinde qabyldanýy múmkin. Qalaı bolǵanda da, biz kásibı jýrnalısterge qatysty ákimshilik nemese qylmystyq isterdiń barynsha ashyq ári obektıvti qaralýy qajet ekenin árdaıym talap etip kelemiz. Jýrnalısterimizge qatysty isterdi tıisti organdar zań talaptaryn saqtaı otyryp, jan-jaqty ári ádil qaraıtynyna senimdimin», dep atap ótti mınıstr.
Sonymen qatar Aıda Balaeva mınıstrlik óz quzyreti sheginde jýrnalısterdiń quqyqtaryn qorǵaýǵa jáne sot isteriniń ádil qaralýyn qamtamasyz etý úshin qajetti barlyq sharalardy qabyldaýǵa daıyn ekenin aıtty.
Buǵan deıin Orda.kz jetekshisi Gúlnar Bajkenovamen QazTAG-qa qatysty qylmystyq is qozǵalǵan edi. Budan bólek, Polısııa departamenti tintý júrgizilgenin rastap, Bajkenovanyń úıinen, sondaı-aq Orda redaksııasynan qurylǵylar tárkilengenin habarlady. Keıin tergeý soty Gúlnar Bajkenovany 2 aı úı qamaýǵa alý týraly sheshim shyǵardy.
