Grek-rım kúresi. Nurmahan Tynálıev – eki dúrkin Azııa chempıony!

ASTANA. 11 mamyr. Katar astanasy – Dohada ótip jatqan kúres túrlerinen Azııa chempıonatynda Qazaqstan qorjynyna taǵy bir altyn medal tústi. Bul joly grek-rım kúresinen Nurmahan Tynálıev (130 kg.) qurlyq chempıony atandy. Bul týraly sporttyq jekpe-jek jáne kúsh qoldanylatyn sport túrleri konfederasııasynyń resmı saıty confederation.kz habarlady. Nurmahan Tynálıev alǵashqy beldesýinde Irak palýany Haıder Kaabıdi jeńse, shırek fınalda Úndistan senim artqan Navın Navınnen basym tústi. Al jartylaı fınalda ırandyq Bashır Babadjanzalehtiń jaýyrynyn jer ıisketti. Sheshýshi synda Qytaı eliniń ókili Kıan Mendi alyp uryp, eki dúrkin Azııa chempıony atandy. Alǵash ret ol byltyr Úndistan astanasy – Delıde ótken qurlyqtyq dodada top jarǵan bolatyn. Sondaı-aq, túıe palýanymyzdyń úsh márte álem chempıonatynda qola júlde alyp, mereıimizdi tasytqany esimizde (Máskeý, 2010 j., Ystambul, 2011 j., Býdapesht, 2013 j.). Odan bólek, eki dúrkin Azııa oıyndarynyń chempıony (Gýanjoý, 2010 j., Inchhon, 2014 j.). Dohadaǵy saıysta Nurmahannyń «altynynan» bólek, grek-rım kúresiniń palýandary qorjynymyzǵa 1 kúmis jáne 3 qola medal saldy. Kúmis júlde Nursultan Tursynovtyń (85 kg.) enshisine jazylsa, Marǵulan Ásembaev (98 kg.), Jasulan Qoshanov (80 kg.) jáne Demeý Jadraev (66 kg.) «qolaǵa» qol jetkizdi. Sonymen qatar, atalǵan qurlyqtyq dodada erkin kúres jáne áıelder kúresinen de aıtarlyqtaı nátıje kórsettik. Atap aıtsaq, erkin kúresten Dáýlet Nııazbekov (61 kg.) Azııa chempıony atandy. Al áıelder kúresinde Elmıra Syzdyqova (69 kg.) – kúmis, Juldyz Áshimova (53 kg.), Ekaterına Larıonova (63 kg.) jáne Gúlmaral Erkebaeva (75 kg.) qola medalǵa qol jetkizdi. Elaman Qońyr. Derek, sýret: confederation.kz.