Foto: Almaty ákimdigi
Almaty qalasynyń Kommýnaldyq ınfraqurylym jáne turǵyn úı ınspeksııasy habarlaǵandaı, qaladaǵy qar kúreý jumystaryna 2 728 jumysshy men 75 jedel brıgada jumyldyrylǵan. Qala joldaryna 1 000-nan astam arnaıy tehnıka shyǵaryldy, onyń ishinde kóktaıǵaqty boldyrmaý úshin arnaıy qospa sebetin 228 qurama jol mashınasy bar. Kolonnalardyń qozǵalysyn qamtamasyz etý úshin 22 polısııa ekıpajy, sondaı-aq 10 evakýator men manıpýlıator tartylǵan.
Mamandardyń aıtýynsha, saǵat 04:00-ten bastap magıstraldar men aýdandyq kóshelerdi tazalaıtyn 21 kolonna jumysqa kiristi. Sonymen qatar trotýar, aıaldama men júrginshiler aýmaǵy kúrelip jatyr. Saǵat 05:00-de 37 jeke merdiger uıymnyń 1 790 jumysshysy men 256 tehnıkasy aýlalardy tazalaý jumystaryna jumyldyryldy.
Buǵan qosa, qalada jol men kósheniń jaǵdaıyn baqylaý úshin táýlik boıy kezekshilik qoıylǵan. Barlyq kommýnaldyq qyzmet qar tolyq tazalaǵanǵa deıin kúsheıtilgen rejımde jumysyn jalǵastyra beredi.
