Stıheev osyndaı bir is týraly aıtyp berdi.
«2006 jyly Qaraǵandy oblysynda asa aýyr qylmys jasaldy. Jetpiske taıaǵan áıel dúkenge bara jatqan jolda qańyrap qalǵan at qorasynyń janynan ótken. Sol jerde oǵan belgisiz adam shabýyl jasap, zorlap, óltirgen. Oqıǵa ornynda az mólsherde bıologııalyq izder ǵana qalǵan», dedi Stıheev.
Onyń aıtýynsha, sol kezdegi tehnıkalyq múmkindikter bul izderdi sáıkestendirýge jetkiliksiz bolǵan. Qylmys jyldar boıy ashylmaı kelgen.
«Bıyl jabdyqtarymyzdy jańarttyq. Burynǵy qylmystardan qalǵan barlyq bıomaterıaldy qaıtadan zerttep, krımınalıstıkalyq esepter, sonyń ishinde DNQ bazasymen salystyrdyq. Nátıjesinde bir azamat anyqtaldy. Qazir onyń jasy 55-te», dedi departament basshysy.
Kúdikti qylmysyn moıyndaǵan. Ol qazirgi ýaqytta kolonııada jazasyn ótep jatyr. Stıheevtiń aıtýynsha, tıisti saqtaý rejımderi saqtalsa, dáleldemelik materıaldar 20–30 jyldan keıin de zertteýge jaramdy bolady. Ol úshin temperatýra men ylǵaldylyqty baqylaıtyn arnaıy saqtaý kameralary qoldanylady.
Bıyl krımınalıster 8 myńnan astam qylmysty ashqan.
Qaraǵandy oblysy
