Mańǵystaý oblystyq kópbeıindi aýrýhanasynyń baspasóz qyzmetiniń málimetinshe, oblystyq kópbeıindi aýrýhanasynda 45 jastaǵy er adamnyń mı ólimi anyqtaldy. Mańǵystaý oblysy boıynsha transplantasııa jónindegi óńirlik úılestirýshi Indıra Amanqosqyzy men stasıonarlyq koordınator Ilııas Iýsýpuly týystaryna qajetti túsindirý jumystaryn júrgizdi.
Jaqyndary batyldyq tanytyp, donorlyqqa kelisim bergen soń aýrýhana bazasynda Densaýlyq saqtaý mınıstrliginiń Transplantattaýdy jáne joǵary tehnologııalyq medısınalyq qyzmetterdi úılestirý jónindegi respýblıkalyq ortalyǵy mamandarymen birlesip júrek alý operasııasy jasaldy.
Donordyń júregi uzaq ýaqyt kútý paraǵynda turǵan naýqasqa sátti transplantasııalandy. Operasııany Densaýlyq saqtaý mınıstrliginiń Transplantasııa ortalyǵynyń mamandary sátti júzege asyrdy.
- Bul – óńirimiz úshin erekshe mańyzdy oqıǵa. Donorlyq mı óliminiń resmı rastalýynan keıin barlyq medısınalyq rásimder zańdy túrde oryndaldy. Biz donorlyqqa sheshim qabyldaǵan otbasyna shynaıy qurmet kórsetemiz jáne adam ómirin qutqarýǵa baǵyttalǵan izgi qadamdary úshin alǵys aıtamyz, - dedi Mańǵystaý oblystyq kópbeıindi aýrýhanasy dırektorynyń m.a. Berik Kaýnov.
Mundaı jaǵdaı Mańǵystaý óńirinde alǵash ret tirkelip otyr. Buǵan deıin oblysta qaıtys bolǵannan keıingi donorlyq fakti kezdespegen.
Mańǵystaý oblysy boıynsha transplantasııa jónindegi óńirlik úılestirýshi Indıra Amanqosqyzynyń aıtýynsha, qazir jalpy kútý paraǵynda 175 mańǵystaýlyq bar. Onyń ishinde 165 eresek, 3 bala - búırek, 4 eresek, 1 bala – baýyr, 2 eresek júrek transplantasııasyn kútýde.
Álemdik tájirıbede qaıtys bolǵannan keıingi donorlyq adamgershiliktiń eń joǵary kórinisi sanalady. Bir donor alty adamǵa deıin ómir syılaı alady.
