Foto: istockphoto.com
Qarjy monıtorıngi agentiginiń málimetinshe, kompanııalar eki jyl boıy turǵyn úı keshenderin qajetti ruqsat qujattarynsyz, jobalyq-smetalyq qujattamasyz, memlekettik saraptama men avtorlyq qadaǵalaýsyz salǵan. Soǵan qaramastan, ınternet resýrstarynda páterlerdi tómen baǵamen jáne paıyzsyz bólip tóleý múmkindigimen jarnamalap otyrǵan.
Ýáde etilgen alty kópqabatty úıdiń ornyna «Irtysh Riverside» kesheninen tek bir ǵımarattyń qańqasy ǵana kóterilgen. Buǵan deıin kompanııa zańsyz qurylys, ruqsatsyz kásipkerlikpen aınalysý jáne nysan salý faktileri boıynsha úsh birdeı ákimshilik bappen jaýapqa tartylyp, qurylysty toqtatý týraly sheshim shyǵarylǵan.
Alaıda soǵan qaramastan, kompanııa basshylyǵy áreketin jalǵastyryp, jańa satyp alýshylardy tartqan.
«Nátıjesinde 64 azamatpen jalǵan brondaý sharttary jasalǵan. Zańsyz tartylǵan qarajattyń jalpy somasy 1 mlrd teńgeden asty. Túsken qarajat О́skemen qalasyndaǵy basqa da baılanysy bar kompanııalardyń shottaryna aýdarylyp, onda da zańsyz qurylys jumystary júrgizilgen», delingen habarlamada.
Keltirilgen shyǵyndy óteý maqsatynda kúdiktilerdiń múlkine shekteý qoıyldy – 2 páter, 10 jer telimi, 6 avtokólik. Is uıymdastyrýshysynyń ózi qamaýǵa alynǵan.
