Keńes jumysyna Ǵylym jáne joǵary bilim mınıstri Saıasat Nurbek, Oqý-aǵartý mınıstri Juldyz Súleımenova, Eńbek jáne halyqty áleýmettik qorǵaý mınıstriniń mindetin atqarýshy Asqarbek Ertaev, sondaı-aq bolashaq pedagogterdi daıarlaýǵa mamandanǵan joǵary oqý oryndarynyń basshylary qatysty.
Kezdesýdiń negizgi taqyryby pedagogıkalyq bilim berý sapasy men oǵan tikeleı baılanysty mektepke deıingi jáne mekteptegi oqytýdaǵy ózekti máseleler boldy. Vıse-premerge Pedagogıkalyq bilim berýdi damytý tujyrymdamasyn iske asyrýdyń negizgi baǵyttary men nátıjeleri baıandaldy. Buǵan qosa EYDU júrgizetin Halyqaralyq oqytý men oqý zertteýiniń (TALIS) aıasynda daıyndalǵan analıtıkalyq qorytyndylar tanystyryldy. Zertteý keıingi úsh jyldaǵy pedagogterdi daıarlaý júıesin jańǵyrtý barysyndaǵy oń ózgeristerdi de, onyń álsiz tustaryn da kórsetti. Atap aıtqanda, joǵary oqý oryndaryndaǵy muǵalimder men tárbıeshilerdi sapasyz daıarlaý faktileri men mektep túlekteriniń jetkiliksiz daıyndyq deńgeıi ózara baılanysty máseleler retinde atalyp ótti.
Keńes barysynda fýnksıonaldyq saýattylyqty arttyrý, muǵalimderdiń synı oılaý men sıfrlyq daǵdylaryn damytý ádistemelerinen bastap, jasandy ıntellektti oqý úderisine engizýdiń naqty tetikterine deıingi birqatar másele talqylandy.
Sondaı-aq búginde Qazaqstanda bakalavrıat deńgeıinde pedagog daıarlaý lısenzııasy bar 52 joǵary oqý orny jumys istep jatqanyna qaramastan, kadr tapshylyǵynyń saqtalyp otyrǵany erekshe aıtyldy. Qordalanǵan máselelerdi eńserý jóninde salalyq vedomstvo basshylarynyń kózqarastarymen qatar, pedagogıkalyq joǵary oqý oryndarynyń basshylarynyń pikirleri de tyńdaldy.
О́z kezeginde Vıse-premer Aıda Balaeva qalyptasqan jaǵdaıdyń sebepterine nazar aýdardy. Atap aıtqanda, mınıstrlik, ákimdik, joǵary oqý orny arasyndaǵy tıimdi vedomstvoaralyq ózara is-qımyldyń joqtyǵyn atady. Onyń aıtýynsha, tek ózara úılesimdi ári júıeli jumys qana mektepterdi qajetti mamandarmen qamtamasyz etýge, óńirlerdegi kadr tapshylyǵyn aldyn ala, tıimdi túrde sheshýge múmkindik beredi. Al bul tapshylyqtyń negizgi faktory – eńbek naryǵyna jasalatyn jan-jaqty taldaýdyń bolmaýy.
«Kadr tapshylyǵyna baılanysty óńirler boıynsha qabyldaý saıasatyn qaıta qaraý qajet. Keı jerlerde fakýltetterge qabyldaý kólemin arttyrý kerek. Eger bizge pán muǵalimderi jetpese, olardy daıarlaýǵa tıisti granttar bólý qajet. Joǵary oqý oryndary eńbek naryǵyna beıimdelýge tıis. Jaqyn ýaqytta salada aıtarlyqtaı ózgerister bolýy múmkin. Aıtalyq, jasandy ıntellekttiń damýyna baılanysty birqatar mamandyq ózektiligin joǵaltady. Osyny eskere otyryp, joǵary oqý oryndary men kolledjder naryqtyń naqty qajettilikterine saı jumys isteýge tıis», dedi A.Balaeva.
Buǵan qosa ol pedagogterdi daıarlaý sapasyna tikeleı áser etetin praktıkaǵa baǵdarlanǵan oqytýdyń da mańyzyn atap ótti.
«Tájirıbesiz teorııanyń paıdasy joq. Mamannyń bilimi tek ony is júzinde qoldanǵanda ǵana nátıjeli bolady. Barlyq joǵary oqý orny stýdentteriniń praktıkalyq daıyndyǵyn uıymdastyrýda teń múmkindigi bolýǵa tıis. Alaıda bul naqty ári muqııat josparlaýdy talap etedi. Búginde biz bolashaq muǵalimderdi daıyndaǵanymyzben, jas mamandar dıplom alǵan soń salada qalmaıdy. Bul óz kezeginde kadr tapshylyǵyn arttyra beredi. Bul máseleni sheshýge kúsh biriktirýimiz kerek. Qazir vedomstvolar arasyndaǵy ózara is-qımyl burynǵydan da mańyzdy. Ortaq maqsat pen mindetterimiz bar ekenin umytpaýymyz qajet», dedi A.Balaeva.
Sóz sońynda Úkimet basshysynyń orynbasary birqatar naqty mindetter men hattamalyq tapsyrmalardy atap ótip, olardyń múmkindiginshe qysqa merzimde oryndalýynyń mańyzdylyǵyn basa aıtty.
Birinshiden, salalyq mınıstrlikter joǵary oqý oryndarymen birlese otyryp, Pedagogıkalyq bilimdi damytý tujyrymdamasyn tolyqtyryp, jasandy ıntellekt tehnologııalarynyń qoǵamdyq ómirge belsendi enip jatqanyn eskerýi qajet. Ekinshiden, pedagogterdi daıarlaý úderisin praktıkalyq baǵytta kúsheıtip, stýdentterdiń óndiristik tájirıbesin respýblıka kóleminde bir júıege keltirip engizý boıynsha jumys josparyn ázirleý kerek.
Úshinshiden, memlekettik bilim granttaryn qaıta bólý máselesin qarastyryp, ony mindetti túrde óńirlik qajettilikter men túlekterdiń eńbekke ornalasý nátıjelerine sáıkestendirý qajet. Tórtinshiden, mektepke arnalǵan oqýlyqtardy daıarlaý júıesin qaıta taldap, oǵan jetekshi pedagogıkalyq ýnıversıtetterdiń mindetti túrde qatysýy qamtamasyz etilýge tıis.
Buǵan qosa Vıse-premer joǵary oqý oryndaryn memlekettik ıdeologııalyq jumysty ilgeriletýde belsendi bolýǵa shaqyryp, onyń bolashaq pedagogterdi, ásirese balabaqsha júıesindegi mamandardy daıarlaýdaǵy erekshe mańyzdylyǵyn atap ótti. Osy oraıda Ǵylym jáne joǵary bilim mınıstrligine elimizdiń barlyq JOO-larynda Memleket basshysy bekitken ishki saıasatty júzege asyrýdyń jańa qaǵıdalaryn tárbıelik júıege engizý jumysyn uıymdastyrý júkteldi.
