Sýret: gov.kz
Aksııa aıasynda elimizdiń barlyq óńirleri men respýblıkalyq mańyzy bar qalalar Abaı oblysyna bir-bir áleýmettik nemese mádenı nysan syıǵa tartady. Keńeste Semeı qalasynyń Bas josparyna ózgerister engizý, arnaıy ekonomıkalyq aımaq (AEA) qurý máseleleri talqylandy. AEA quramyna 1 200 gektar alańdy qamtıtyn jańa ákimshilik-iskerlik ortalyq, zamanaýı turǵyn úı keshenderi, 40-tan astam ákimshilik, kommersııalyq jáne áleýmettik nysan kiretin bolady.
Semeı qalasynda jańa ınjenerlik ınfraqurylym, qazandyq, jylý, elektr, sý qubyry men sý burý jelilerin salý mindetteri qaraldy. Búginde Abaı oblysynyń ákimdigi aksııa aıasyndaǵy jobalardy júzege asyrý boıynsha óńirlermen belsendi jumys júrgizip jatyr. «Abaıǵa qurmet» aksııasyn alǵashqylardyń biri bolyp Mańǵystaý oblysynyń turǵyndary qoldap, Dostyq úıiniń qurylysyn bastap ketti.
Túrkistan oblysy – kórme ortalyǵyn, Qyzylorda oblysy – «Anaǵa taǵzym» ǵımaratyn, Atyraý oblysy – «Abaı álemi» ortalyǵyn salady. Shymkent – Shyǵarmashylyq ortalyǵyn, Soltústik Qazaqstan oblysy – Memlekettik rámizder alańyn, Shyǵys Qazaqstan oblysy – Ertis ózeni jaǵalaýyn abattandyrady. Aqtóbe oblysy – Jekpe-jek saraıyn, Pavlodar oblysy – Ústel tennısi ortalyǵyn turǵyzady. Astana «Keleshek» mektebin syıǵa tartsa, Almaty – medıaortalyq, Qaraǵandy oblysy – botanıkalyq baq, Batys Qazaqstan oblysy – jelilik saıabaq, Qostanaı oblysy – Rýhanııat ortalyǵyn salady.
Qanat Bozymbaev qalǵan óńirlerge jobalardy aıqyndaý men júzege asyrý jumystaryn jedeldetýdi tapsyrdy. «Úılestirilgen jumystyń nátıjesinde barlyq jobany biryńǵaı arhıtektýralyq stılde sátti aıaqtap, Abaı atyna laıyqty ári óńirdiń bolashaǵy úshin mańyzdy ınfraqurylym quratynymyzǵa senimdimin», dedi ol.
Júktelgen mindetterdi tıimdi ári ýaqtyly júzege asyrý úshin Premer-mınıstrdiń orynbasary О́nerkásip jáne qurylys, Qarjy, Ulttyq ekonomıka mınıstrlikterine jáne óńirlerdiń ákimderine birqatar tapsyrma berdi.
