Stansııany iske qosý rásimine oblys ákimi Qumar Aqsaqalov qatysyp, jańa nysannyń óńir úshin mańyzy erekshe ekenin atap ótti.
«Bul elektr stansııalarynyń iske qosylýy energııa resýrstary tapshylyǵyn aıtarlyqtaı qysqartyp, jańa ınvestısııalar tartýǵa jáne iri jobalardy júzege asyrýǵa qolaıly jaǵdaı qalyptastyrady. Jasyl energetıka – jańǵyrýdyń, ınnovasııalardyń jáne óńir bolashaǵyna degen jaýapkershiliktiń nyshanyna aınalyp keledi», dedi oblys ákimi.
Jańa kún elektr stansııasy zamanaýı joǵary tıimdi kún panelderimen jabdyqtalǵan jáne Qostanaı oblysyndaǵy alǵashqy nysan. О́ńir ekonomıkasy úshin mańyzy zor nysan qurylysyna 7,2 mlrd teńge ınvestısııa salynǵan. Nátıjesinde 16 turaqty jumys orny ashylyp otyr.
Kún energııasyn ıgerý elektr qýatyna jumsalatyn shyǵyndardy edáýir azaıtady. Sonymen qatar «taza» energııa óndirý dástúrli energııa júıesine túsetin júktemeni tómendetip, kómirqyshqyl gazynyń shyǵarylýyn azaıtady.
«Solidcore Resources» kompanııasynyń bas atqarýshy dırektory Vıtalıı Nesıs jobanyń kompanııa strategııasyndaǵy ornyn atap ótti:
«Biz óndirisimizdiń qorshaǵan ortaǵa áserin barynsha azaıtyp, onyń energııa tıimdiligin arttyrýǵa umtylamyz. Jańa kún elektr stansııasy bizge osy múmkindikti berip otyr. Bul nysan – Qostanaı oblysyn damytýǵa qosqan úlesimiz jáne jaýapty ári ınnovasııalyq óndiristiń aıqyn mysaly», dedi ol.
Joba aıasynda jalpy aýdany 98 000 m² bolatyn 36 myńnan astam kún paneli ornatyldy. Kún stansııasynyń jyldyq óndirisi shamamen 28,5 mln kVt/saǵatty quraıdy.
