Foto: REUTERS
Buǵan deıin Zelenskıı elde saılaý ótkizýge daıyn ekendigin aıtty. Onyń sózinshe, prezıdenttik saılaý tek qana atys toqtaǵan jaǵdaıda ótedi. Qaýipsizdik saılaý prosesinde basty shart bolyp sanalady.
«Biz prezıdent Tramppen kez kelgen formatta jumys isteýge daıynbyz. Eger AQSh prezıdenti Ýkraınadaǵy saılaý týraly kóbirek aıtsa, biz ony ótkizýge daıynbyz. Ýkraına demokratııadan qashpaıdy. Biraq saılaý múmkin bolý úshin qaýipsizdik qamtamasyz etilýi qajet. Amerıka buǵan eń úlken kómek kórsete alady. Kem degende saılaý prosesi men daýys berý kezinde atysty toqtatý kerek. Bul másele Aq úı tarapynan Kremlmen talqylanýy tıis», dedi Zelenskıı.
Eske salsaq, Ýkraınadaǵy prezıdent saılaýy bastapqyda 2024 jylǵa josparlanǵan edi. Alaıda Reseımen qaqtyǵysqa baılanysty keıinge qaldyryldy. Halyqaralyq kepildikter men seriktesterdiń qoldaýymen saılaýdy eki-úsh aı ishinde uıymdastyrý múmkindigi qarastyrylǵan.
Financial Times basylymynyń jazýynsha, AQSh prezıdenti Donald Tramp Ýkraınadaǵy soǵysty retteý boıynsha ilgerileýge qol jetkizýdi kózdep otyr. Tramptyń aıtýynsha, usynylǵan beıbitshilik josparyn barlyq taraptar qoldaıdy.
«Men Zelenskııdiń áli beıbitshilik josparyn tolyq oqymaǵanyna biraz renjip otyrmyn. Onyń adamdary jaqsy qabyldady, biraq ózi oqyǵan joq. Reseı de kelisimge daıyn dep oılaımyn», dedi Tramp.
Kreml keıbir usynystardy talqylaǵanyn rastaǵanymen, birqatar pýnktter boıynsha kelispeýshilikter bar ekenin jetkizgen. Kıev te apta boıy beıbit kelisim boıynsha Eýropa seriktesterimen konsýltasııalar júrgizgen. Washington Post málimetine súıensek, AQSh tarapynan jańartylǵan usynystar front boıyndaǵy áskerı belsendilikti tómendetý sharalaryn jáne halyqaralyq qatysýdy qamtıdy. Biraq bul resmı túrde jarııalanǵan joq.
Kelesi kezeń – Berlınde kezdesý, onda Zelenskıı AQSh jáne Eýropa lıderlerimen jolyqpaq. Belgilengen merzim – 14 jáne 15 jeltoqsan. Oǵan AQSh tarapynan prezıdenttiń arnaıy ókili Stıv Ýıtkoff qatysady dep kútiledi. Sonymen qatar kezdesýge Fransııa prezıdenti Emmanýel Makron, Ulybrıtanııa Premer-mınıstri Kır Starmer jáne Germanııa kansleri Frıdrıh Mers qatysady dep josparlanǵan.
Eske salaıyq, Zelenskıı Ýkraınada saılaý ótkizýge daıyn ekenin málimdep, AQSh-tan jáne eýropalyq áriptesterden saılaýdy ótkizý úshin qaýipsizdikti qamtamasyz etýdi suraǵan edi.
Sondaı-aq buǵan deıin Zelenskıı Qazaqstanda Pýtınmen kezdesýge daıyn ekenin aıtqan.
