Is-shara Memleket basshysy Qasym-Jomart Toqaevtyń «Jumysshy mamandyqtar jyly» bastamasy aıasynda uıymdastyryldy.
Ǵylymı-tehnologııalyq sessııaǵa oqýshylar, stýdentter, jas mamandar men jańashyl ıdeıa usynýǵa yntaly jastar jınalyp, óńirdiń ózekti máselelerin sheshýge baǵyttalǵan jobalaryn ortaǵa saldy. Is-sharaǵa qatysqan 20-ǵa jýyq komanda aýyl sharýashylyǵy, ekologııa jáne sıfrlandyrý baǵyttary boıynsha naqty ári qoldanbaly sheshimder usyndy. Qatysýshylar qysqa ýaqyt ishinde ıdeıany pysyqtap, ony ınnovasııalyq jobaǵa aınaldyrý arqyly ózderiniń kásibı biliktiligi men komandalyq jumys daǵdylaryn kórsetti.
Usynylǵan jobalar ıdeıanyń ózektiligi, tehnıkalyq júzege asyrylý deńgeıi, jańashyldyǵy, praktıkalyq mańyzdylyǵy jáne tanystyrylym sapasy boıynsha sarapshylar tarapynan baǵalandy. Innovasııalyq ǵylymı-tehnologııalyq sessııa jas talanttardy qoldaýǵa, jańa bastamalardy damytýǵa jáne ýnıversıtettiń ınnovasııalyq ekojúıesin nyǵaıtýǵa baǵyttalǵan tıimdi alańǵa aınaldy.
Sondaı-aq oqý ornynda ótken «Eńbek» fotokórmesi eńbek adamyn dáripteýge arnaldy. Kórmede 40-qa jýyq keıipkerdiń kúndelikti eńbegi beınelengen fotosýretter qoıyldy. Atap aıtqanda, oqý ornynyń sharýashylyq-tehnıkalyq salasynda eńbek etetin qyzmetkerlerine erekshe nazar aýdaryldy. Olardyń qatarynda ýnıversıtet ashylǵaly beri 30 jyldan astam ýaqyt eńbek etip kele jatqan tájirıbeli mamandar bar.
«Ýnıversıtetimizde 400-ge jýyq jumysshy maman qyzmet atqarady. Olardyń arasynda oqý ordamyzda 10-30 jyldan astam ýaqyttan beri eńbek etip júrgen mamandar bar. Sondyqtan olarǵa arnap búgingideı joba daıyndadyq. Jumysshy mamandarymyzdyń mańdaı teri men adal eńbegi qurmetke laıyq. Ýnıversıtettiń damýyna úles qosyp júrgen barsha janǵa úlken alǵys bildiremin», dedi ýnıversıtet rektory Janar Temirbekova.
