Otyrysqa Ulttyq komıssııanyń tóraǵasy, Premer-Mınıstrdiń orynbasary – Mádenıet jáne aqparat mınıstri Aıda Balaeva, Qazaqstan Respýblıkasynyń Oqý-aǵartý mınıstri Juldyz Súleımenova, beıindi memlekettik organdardyń ókilderi, «Atameken» Ulttyq kásipkerler palatasynyń ókilderi jáne Ulttyq komıssııa músheleri, sondaı-aq óńirlik ákimdik ókilderi qatysty.
Otyrys jumysyn asha otyryp, Aıda Balaeva áıelderdiń ekonomıkalyq derbestigi eldiń turaqty damýynyń, otbasylardyń ál-aýqaty men áleýmettik turaqtylyqtyń negizgi faktorlarynyń biri ekenin atap ótti. Osyǵan baılanysty áıelderdi zamanaýı ekonomıkalyq úderisterge, sonyń ishinde sıfrlyq ekonomıkaǵa tartý úshin qolaıly jaǵdaılar qalyptastyrýdyń mańyzdylyǵy artatynyn aıtty.
.jpg)
Ulttyq ekonomıka birinshi vıse-mınıstri Azamat Amrın elimizde áıelderdiń iskerlik belsendiligi turaqty joǵary deńgeıde saqtalyp otyrǵanyn atap ótti. Onyń aıtýynsha, qazir áıelder shaǵyn jáne orta bıznes sýbektileriniń shamamen 48 paıyzyn basqaryp otyr, al 2025 jylǵy jeltoqsandaǵy jaǵdaı boıynsha elde bir mıllıonnan astam kásipker áıel tirkelgen.
Otyrys barysynda «Atameken» UKP Basqarma tóraǵasynyń orynbasary Gúlnar Bıjanova negizgi baıandama jasap, jedel sıfrlandyrý jáne jańa quqyqtyq ortanyń qalyptasýy jaǵdaıynda áıelder kásipkerligin áleýmettik sanat retinde emes, ekonomıkanyń strategııalyq mańyzdy segmenti ári turaqty ósisniń resýrsy retinde qarastyrý qajettigin atap ótti.
Onyń aıtýynsha, búginde Qazaqstan ekonomıkasy qarqyndy túrde ózgerýde jáne osy jańa kezeńde áıelder bıznesine ólshemdi, aıqyn ári ekonomıkalyq turǵydan mańyzdy kásipkerlik ortanyń quramdas bóligi retinde jańasha kózqaraspen qaraý qajet.
Retteýshilik saıasat, zań shyǵarý jáne naqty sektor salasynda tájirıbeli maman ári UKP ókili retinde sóz sóılegen Gúlnar Bıjanova birqatar strategııalyq basymdyqty aıqyndady.
Alǵashqy basymdyq – áıelder kásipkerligin ınstıtýsıonaldyq turǵyda taný. Onyń aıtýynsha, «áıelder kásipkerligi» uǵymyn zańnamalyq deńgeıde bekitip, ony memlekettik qoldaý sharalary júıesine ıntegrasııalaý oryndy bolmaq. Úlgi retinde Qyrǵyz Respýblıkasynyń tájirıbesi keltirildi, onda zańnamalyq deńgeıde «áıelder kásipkerligi» uǵymy engizilip, bank sektorynyń qatysýymen Kásipker áıelderdi qarjylandyrý kodeksi iske asyrylyp jatyr.
Atalǵan tásil áıelder bıznesin osal top retinde emes, qarjy naryǵy men memlekettik saıasattyń derbes, ashyq segmenti retinde qarastyrýǵa múmkindik beredi. Bul, ásirese, ShOB-ty qoldaý, ındýstrııalyq-ınnovasııalyq, eksporttyq jáne óńirlik baǵdarlamalarǵa ıntegrasııalaý turǵysynan ózekti bolyp otyr.
Ekinshi basym baǵyt retinde quqyqtyq jáne retteýshi tetikterdiń sapasy belgilendi. Kez kelgen qoldaý sharalarynyń tıimdiligi retteýshi ortanyń turaqtylyǵy men boljamdylyǵyna tikeleı baılanysty ekeni atap ótildi. Baıandamashynyń pikirinshe, jekelegen salalardy retteýshi áserdi taldaý rásiminen tolyqtaı shyǵarý saraptama sapasyn tómendetip, saldarynan quqyqtyq jáne sot daýlarynyń kóbeıýine ákeledi.
Sondaı-aq, Intellekt arqyly retteý ortalyǵynyń tıimdi jumysyn jolǵa qoıý qajettiligine erekshe nazar aýdaryldy. Bul ortalyq bıznespen jáne saraptamalyq qaýymdastyqpen tyǵyz ózara is-qımylda jumys isteýge tıis. Retteýshi saraptamanyń negizgi nátıjesi tek quqyqtyq normalar ǵana emes, qabyldanatyn sheshimderdiń ekonomıkalyq saldaryn naqty túsiný bolýy qajet ekeni aıtyldy.
Otyrys qorytyndysyna sáıkes jıynǵa qatysýshylar sıfrlyq ekonomıka jaǵdaıynda qarjylyq jáne qarjylyq emes qoldaý sharalaryna qoljetimdilikti keńeıtýge baǵyttalǵan áıelder kásipkerligi týraly zań jobasyn ázirleý bastamasyn qoldady. Sonymen qatar, elektrondyq kommersııa, salyq salý jáne sıfrlyq quzyretter salasyndaǵy bilim berý jáne onlaın baǵdarlamalardy damytý, sondaı-aq óńirlik jáne aýyldyq bastamalardy qoldaýdy kúsheıtý boıynsha jumystar jalǵasatyn bolady.
