Foto: Astana ákimdigi
Sol kúni saǵat 17:30-dan bastap barlyq negizgi lokasııalarda konserttik baǵdarlamalar bastalady. Qala turǵyndary men qonaqtaryn muz aıdyndary, syrǵanaqtar, shaǵyn sáýlettik formalar, fotozonalar jáne túrli merekelik oıyn-saýyq kútedi. Sonymen qatar: «Astana Arena» stadıonynda – dron-shoý, Aqbulaq ózeniniń jaǵalaýynda – merekelik otshashý ótedi.
Nura aýdany
Aýdanda shyrshalar 11 lokasııada jaǵylady. 25 metrlik aýdandyq shyrsha «Astana Arena» stadıonynyń avtoturaǵynda ornatylady. Munda muz aıdyny, syrǵanaqtar, fotozonalar men balalarǵa arnalǵan ınteraktıvter uıymdastyrylady. Shyrsha shamy jaǵylar aldynda dron-shoý kórsetiledi.
Ortalyq saıabaqta uzyndyǵy 213 metrlik sheńberli muz aıdyny, syrǵanaqtar, fotozonalar jáne «Aıýlar otbasy» jaryq ınstallıasııasy ornatyldy. Saıabaqtyń ortalyq kireberisinde 24 metrlik shyrsha qoıylǵan.
Ǵashyqtar parkinde saýda pavılondary, muz aıdyny, jaryq arkalar, «Baqyttymyn» músindik kompozısııasynyń merekelik bezendirilýi jáne buǵy, qoıan, aıý beınelerindegi shaǵyn sáýlettik formalar bar.
Áıteke bı kóshesindegi alleıada jáne «Býharest» parkinde jaryq ınstallıasııalar men fotozonalar ornatylǵan.
«Úrker» turǵyn alabynda muz aıdyny men qar syrǵanaqtary ashylady.
Almaty aýdany
Aýdanda shyrshalar 4 negizgi lokasııada jaǵylady.
Aqbulaq jaǵalaýynda 25 metrlik shyrsha ornatylyp, gnomdar, qoıandar, jaryq aǵashtar men fotozonalar qoıylady. Bul jerde merekelik salıýt bolady.
«Jeruıyq» parkinde dıametri 80 metrlik muz aıdyny, syrǵanaq jáne 2 tiri shyrsha bezendirilgen.
Sondaı-aq Qajymuqan Muńaıtpasov kóshesindegi «Kolızeı» alańynda jáne Qoshqarbaev dańǵyly boıynda merekelik ınstallıasııalar men syrǵanaqtar jumys isteıdi.
Esil aýdany
Negizgi merekelik alań – EXPO aýmaǵy. Munda 22 metrlik shyrsha, muz aıdyny men syrǵanaq ornatylady. Shyrshalar sondaı-aq Botanıkalyq baqta, «Jetisý» parkinde, «Baǵystan» turǵyn kesheninde jáne basqa qoǵamdyq keńistikterde jaǵylady.
Saraıshyq aýdany
«Qazaq eli» monýmenti alańynda bıiktigi 25 metrlik shyrsha ornatylady. Alań ertegi álemi stılinde bezendirilip, fotozonalar jasalady.
Saryarqa aýdany
Aýdanda 6 jańajyldyq shyrsha qoıylǵan. Qalalyq alańda 13 metrlik tiri shyrsha, 600 sharshy metrlik muz aıdyny, syrǵanaqtar men konserttik baǵdarlama uıymdastyrylady. Balalardy Aıaz ata men Aqshaqar qarsy alady.
Baıqońyr aýdany
K.Atatúrik atyndaǵy saıabaqta 20 metrlik shyrsha, muz aıdyny men syrǵanaqtar ornatylady. «Jastar» saraıy mańynda 18 metrlik shyrsha janyp, konsertter men balalarǵa arnalǵan oıyndar ótedi.
Bıylǵy konsepsııa
Bıyl elordadaǵy jańajyldyq is-sharalar «Ertegi Fest» biryńǵaı ertegilik stılinde ótedi. Qala jaryq, ınstallıasııalar men qysqy oıyn-saýyqtarǵa toly naǵyz ertegi álemine aınalady.
Ákimdik málimetinshe, muz aıdyndary, syrǵanaqtar, fotozonalar men bezendirý jumystary jeltoqsan aıynyń basynda bastalǵan, jumystar kezeń-kezeńimen aıaqtalady.
