Foto: ashyq derekkóz
Mereke qarsańynda alaıaqtar belsendi túrde áreket etedi. Olar qaýipti faıldar tirkelgen «jańajyldyq quttyqtaýlar» taratyp, sondaı-aq baǵasy ádeıi tómendetilgen syılyqtar men taýarlar týraly jalǵan habarlandyrýlar jarııalaıdy.
Aqsha aýdarylǵannan keıin baılanysty toqtatady. Alaıaqtar anımasııasy nemese mýzykasy bar quttyqtaý jiberip, faıl arqyly parolderge, bank kartalaryna jáne qosymshalarǵa qol jetkizedi. Sondaı-aq naryqtaǵy baǵadan edáýir tómen baǵada taýar nemese syılyq usynady. Aqshany shuǵyl túrde aýdarýǵa kóndiredi. Tólem jasalǵan soń habarlandyrýdy óshirip, jaýap bermeıdi.
«Alaıaqtar jıi jalǵan akkaýnttar men qoldan jasalǵan pikirlerdi paıdalanyp, ózin senimdi satýshy retinde kórsetedi. Sondyqtan beıtanys satýshylarǵa aldyn ala aqsha aýdarmaı, pikirler men akkaýnttyń tarıhyn muqııat tekserý qajet. Beıtanys adamdardan kelgen faıldar men siltemelerdi ashpaı, apk keńeıtimi bar faıldardy birden óshirgenińiz abzal», dep eskertti IIM.
Aıta keteıik, buǵan deıin alaıaqtar turǵyndardy tuzaqqa túsirýdiń jańa aıla-tásilin oılap tapqanyn habarlaǵan edik. Qaskúnemder jetkizý qyzmetteriniń, basqarýshy kompanııalar jáne bankterdiń atynan ártúrli SMS-habarlamalar jiberip, azamattardy ózderi qaıta qońyraý shalýǵa ıtermeleıdi.
