Jaqynda Altaıdyń arǵy jaǵyndaǵy aǵaıynnyń saǵynyshqa toly án kerýeni Baı-ólkeden atajurtqa at basyn tirep, Temirtaý jurtshylyǵyna ǵajap kesh, baıraqty rýh syılady.
Qazaqy án dástúriniń qalpyn buzbaı, ulttyq bolmysty berik saqtaǵan ónerpazdardy qala turǵyndary zor qoshemetpen qarsy alǵany sonshalyq, Temirtaý mádenıet saraıyndaǵy úlken zalda ıne shanshar oryn bolmady.
Kesh ıesi, Mońǵolııa mádenıetiniń ozat qyzmetkeri Aqtanberdi Azatuly – terme óneriniń tanymal ókili, án qorjynynda 130-dan astam týyndy bar sheber oryndaýshy.
О́nerpazdar qatarynda bulbul úndi, Mońǵolııa memleketiniń ozat qyzmetkeri Sáttigúl Qumarhanqyzy, qońyr daýysty opera ánshisi Manathan Tilegenuly, syrly úndi Moldabek Abylaıhanuly jáne jas sazger Orazbek Seıtahmetuly boldy. Olardyń oryndaýyndaǵy Baı-ólkeden jetken áýender ózine tán maqamy, ózgeshe ıirimimen erekshelenip, tyńdarmandy birden baýrap aldy. Bir qyzyǵy, kórermen de kóne ánderdiń áýenine qosylyp otyrdy.
Qurysh qalanyń turǵyndary alystaǵy aǵaıynnyń ónerin ańsap kútkenin kórsetkendeı, kesh boıy erekshe yqylas kórsetýmen boldy. Zal toly kórermenniń kóldeı kóńili men qýanyshy quddy bir Baı-ólkedegi qazaq aýylynyń dýmandy keshindeı ótti. Kórermender shat-shadyman kúıge bólenip, kóshpeli ómirdiń kóne saryndaryn júregimen tyńdady. Altaıdyń baýraıyn saǵynǵan aǵaıyn án-jyrmenen bir serpilip qaldy.
«Uly sózge bas ıetin aǵaıyn, biz sizderdi ańsap keldik. Sizderdiń bizge, bizderdiń sizge degen saǵynyshty osy bir dýmandy keshpen basaıyq dedik. Biz osynsha kórermen jınaımyz dep kútpedik. Osy oraıda úlken qoldaý kórsetip, tamasha keshtiń ótýine úles qosqan temirtaýlyq aqyn qyzdaryńyz Tańsáýle Ágenqyzyna aıtar alǵysymyz sheksiz. Jalpy, qorjynymda 130-ǵa jýyq terme bar. Terme janry – qoǵam aınasy. Sol sebepti, ónegeli osy bir ónerimiz arqyly oı sala bilsek, júrekterińizge sáýle jaǵa alsaq, biz úshin odan asqan olja joq», dedi kesh ıesi Aqtanberdi Azatuly.
Qaraǵandy oblysy
