Sýret: ulysmedia.kz
Satyp alý rásimderin jańǵyrtý sharasy 824 mlrd teńgeni únemdeýge ári qaıta bólýge múmkindik jasap, úderisti 3–6 ese jedeldetti. Nátıjesinde, memlekettik qarjynyń ıgerilý tıimdiligi artty. Sonymen qatar jasalǵan sharttardyń jalpy kólemi 2 esege ósti, otandyq óndirýshilerden satyp alý kólemi 1,5 esege artty. Bul – ishki naryqty qoldaýdyń aıqyn kórinisi. Al shaǵymdar sanynyń 25 paıyzǵa qysqarýy júıedegi ashyqtyq pen tártiptiń kúsheıgenin ańǵartady.
Memlekettik aýdıt júıesi de aldyn alý tetikterin kúsheıtip, 396 mlrd teńge kólemindegi tıimsiz shyǵystarǵa jol bermedi. Bıýdjetti onlaın-monıtorıngteý arqyly túrli alaıaqtyq shemalardyń joly kesilip, shamamen 1 mlrd teńge memleket qazynasyna qaıtaryldy. Bul baqylaýdyń zamanaýı quraldary qarjy tártibin nyǵaıtýda sheshýshi ról atqaratynyn kórsetedi.
Buǵan qosa «Qarjy ortalyǵy» aksıonerlik qoǵamynyń qyzmetin transformasııalaý aıasynda bilim berýdi qarjylandyrýdyń biryńǵaı «Bilimge» portaly iske qosyldy. Jekemenshik mektepterdi akkredıtteý qujattarynan bastap, qarjylandyrý men tólemderge deıingi barlyq úderis tolyq sıfrlandyryldy.
Úderisterdi avtomattandyrýdyń arqasynda 765 jekemenshik mekteppen jedel shart jasalyp, onyń 656-sy 38 mlrd teńgege qarjylandyryldy. Eń bastysy, qarjylandyrý merzimi 10–15 kúnge deıin qysqaryp, bilim berý uıymdary úshin qolaıly ári ashyq júıe qalyptasty.
