Keńeste Densaýlyq saqtaý mınıstrliginiń Áleýmettik medısınalyq saqtandyrý qorynyń qyzmetin jetildirý men sıfrlyq transformasııasyna qatysty tásilderi qaraldy. Halyqqa MÁMS sheńberinde kórsetiletin medısınalyq kómektiń qoljetimdiligi men sapasyn arttyrýǵa qatysty júrgizilip jatqan jumystarǵa nazar aýdaryldy.
Elimizde mindetti áleýmettik medısınalyq saqtandyrý júıesimen shamamen 17 mln adam qamtylǵan, onyń 12 mln-ǵa jýyǵy jeńildikke ıe sanattarǵa jatady. Densaýlyq saqtaý mınıstri Aqmaral Álnazarova MÁMS qarajatynyń jıyntyq kólemi 6 jyl ishinde 6,8 trln teńgeden asqanyn baıandady, onyń 2 trln teńgesi – azamattardyń jeńildikke ıe sanattary úshin berilgen memlekettik jarnalar. Tek bıyldyń ózinde ǵana osy maqsattarǵa 1,4 trln teńge aýdarylǵan.
Jıynǵa qatysýshylar mindetti áleýmettik saqtandyrý paketi kelesi jyldyń 1 qańtarynan bastap keńeıtiletinine baılanysty sıfrlyq tetikterdi engizý arqyly qadaǵalaýdy kúsheıte túsý men júıeniń ashyqtyǵy máselelerin talqylady. Keler jyldan bastap halyqty mindetti áleýmettik medısınalyq saqtandyrýmen qamtý aıtarlyqtaı keńeıedi. Tıisti zańnamalyq ózgerister jańa jyldan bastap kúshine enedi.
Búginde elimizde medısınalyq kómektiń 92%-y avtomatty túrde júzege asyrylady. Kelesi jyldyń sońyna deıin ony 100%-ǵa deıin jetkizý josparlanyp otyr, bul adamı faktordy tolyǵymen alyp tastaýǵa múmkindik beredi.
Odan bólek, satyp alý, medısınalyq qyzmetterge aqy tóleý sııaqty basqa da negizgi bıznes-úderister sıfrlandyryldy. Qordyń aqparattyq júıesin Densaýlyq saqtaý, Eńbek jáne halyqty áleýmettik qorǵaý mınıstrlikteri ári eGov júıelerimen ıntegrasııalaý jeńildikke ıe sanattarǵa qatysty derekterdiń avtomatty túrde jańartylýyn qamtamasyz etti, medısınalyq saqtandyrý júıesi jarnalaryn esepke alýdyń dáldigin arttyrdy.
Bıyl halyqtyń medısınalyq qyzmetter kólemine naqty qajettiligin esepteýdi eskere otyryp, josparlaý qaǵıdalaryn, ádisteri men tásilderin bekitý mańyzdy qadam boldy. Kelesi jyly josparlaýdyń barlyq úderisin sıfrlandyrý aıaqtalady, bul esepteýlerdi tek burynǵy derekter negizinde ǵana emes, sonymen qatar kórsetilgen medısınalyq kómektiń naqty kólemin ári boljamdardy eskere otyryp júzege asyrýǵa múmkindik beredi.
Bıylǵy 1 shildeden beri medısınalyq qyzmetterdiń sapasyna monıtorıng jasaý men aqy tóleý biryńǵaı sıfrlyq kontýrǵa biriktirilgen. Jańa modýl tólem qujattarynyń sanyn 9-dan 3-ke deıin qysqartty, 1S býhgalterııamen úzdiksiz ıntegrasııany qamtamasyz etti. Buǵan qosa júıeniń «álsiz tustary» da anyqtaldy. Yqtımal táýekelder Densaýlyq saqtaý mınıstrliginiń baqylaýynda, olar sıfrlyq quraldardy engizý arqyly joıylady.
Medısınalyq uıymdarda Face ID júıesi engizilip jatyr, bul búginde medısınalyq mekemeler tarapynan tirkeýler sanyn 7%-ǵa tómendetýge, bıýdjet qarajatynyń shamamen 10,5 mlrd teńgesin únemdeýge múmkindik berdi.
Kelesi jyly medısınalyq qyzmetterdi bólýge reıtıngtik baǵany esepteý ındıkatorlaryn tolyq sıfrlandyrý josparlanyp otyr. Sonyń nátıjesinde medısınalyq kómektiń joǵary sapasy men qoljetimdiligin qamtamasyz ete alǵan jetkizýshiler qarjylandyrý múmkindigine ıe bolady. Kelesi jyly medısınalyq derekterdiń biryńǵaı qoımasyn qalyptastyrý jónindegi jumystyń aıaqtalýy kórsetiletin medısınalyq kómekti josparlaý men sapasyn jaqsartýǵa áser etedi.
Halyqqa arnalǵan dári-dármekterdi josparlaý men berý tıimdiligi máselelerine de nazar aýdaryldy. Klınıkalyq hattamalardy sıfrlandyrý men birlesip tóleý tetikterin engizý jumystary kezeń-kezeńimen júrgizilip keledi, bul em alýshylardy qajetti preparattarmen qamtamasyz etý úderisterin ońtaılandyrýǵa múmkindik beredi.
– Maqsat – kórsetiletin medısınalyq qyzmetterdiń sapasyn únemi jaqsarta otyryp, qoljetimdiligin arttyrý. Sıfrlandyrýdyń alǵashqy nátıjelerin qazirdiń ózinde kórip otyrmyz. Ozyq tehnologııalardy qarqyndy engizýdi jalǵastyrý qajet. Úderisterdi avtomattandyrý medısınalyq quramdy bıýrokratııalyq rásimderden bosatyp qana qoımaı, emdeý men dári-dármekke bólingen qarajattyń jumsalýynyń ashyqtyǵyn qamtamasyz etedi. Sol kezde azamattar da, dárigerler de, memleket te reformalardyń nátıjelerin aıqyn kóretin bolady, – dedi Oljas Bektenov.
Jıyn qorytyndysynda Premer-mınıstr Densaýlyq saqtaý, Jasandy ıntellekt jáne sıfrlyq damý mınıstrlikterine úderisterdi sıfrlandyrý jumysyn jandandyrýdy tapsyrdy. Qarjy mınıstrligi densaýlyq saqtaý júıesinde qarjylyq tártipti kúsheıtýge qatysty sharalar qabyldaıdy.
