Foto: Aqorda
Prezıdent Qazaqstandaǵy belsendi qyzmeti jáne Japonııamen ekonomıkalyq yntymaqtastyqty nyǵaıtýǵa qosqan úlesi úshin Mitsui basshylyǵyna rızashylyǵyn bildirdi.
Qazirgi ýaqytta kásiporyn halyqaralyq jetkizý tizbegin qalyptastyrýda, ınfraqurylymdy damytýda, energetıka men ónerkásip salalaryn óristetýde mańyzdy ról atqarady.
Memleket basshysy Qazaqstan ekonomıkanyń negizgi sektorlarynda Mitsui kompanııasynyń qyzmet aıasyn keńeıtýge nıetti ekenin jetkizdi. Atap aıtqanda, kompanııanyń Astanada kúrdeli jóndeý jáne qural-jabdyqtardy qaıta qalpyna keltirý boıynsha óndiristik keshen qurylysyna qatysý josparyn maquldady.
Sondaı-aq ózara qyzyǵýshylyq tanytqan salalar qatarynda asa mańyzdy mıneraldar, kólik-logıstıka, tabıǵı apattardyń aldyn alýǵa arnalǵan tehnologııany engizý baǵyttary bar.
Qazaqstan Prezıdentiniń Tokıoǵa sapary aıasynda Mitsui kompanııasymen birqatar birlesken jobalardy júzege asyrý jóninde memorandýmǵa qol qoıý josparlanǵan.
