Foto: Ashyq derekkóz
Munaıly astananyń sáýlettik kelbetin ózgertetin jańa ǵımarattyń bıiktigi 130 metrdi quraıdy. Joba avtorlarynyń aıtýynsha, qalanyń teńiz deńgeıinen tómen ornalasý ereksheligine baılanysty, záýlim úıdiń 32-qabatynan Kaspıı teńizin tamashalaý múmkin bolady.
Keshen quramynda 600 nómirlik besjuldyzdy qonaqúı, 12 myń sharshy metrden astam kommersııalyq alańdar, 500 oryndyq konferensııa zaly, sondaı-aq SPA, fıtnes ortalyqtary men meıramhanalar qarastyrylǵan.
«TEXOL GROUP» dırektorlar keńesiniń tóraǵasy Shota Abhazavanyń aıtýynsha, jobanyń basty maqsaty – óńirdegi sapaly qonaqúı ınfraqurylymynyń tapshylyǵyn joıý. Qazirgi tańda Atyraýda halyqaralyq jelilik besjuldyzdy qonaqúılerdiń joqtyǵyn eskere otyryp, kompanııa bul olqylyqtyń ornyn toltyrýdy kózdep otyr.
Jobanyń eń erekshe tusy – Atyraýdyń geografııalyq ornalasýyn aıshyqtaıtyn, Eýropa men Azııa qurlyqtarynyń arasynda jyldam ótýge múmkindik beretin zıplaın attraksıony bolmaq. Sonymen qatar keshende jasyl baqtar salynyp, jańartylatyn energııa kózderi paıdalanylady.
Qazirgi ýaqytta daıyndyq jumystary bastalyp ketti: 16 qarashadan beri eski qonaqúı ǵımaratynyń artqy bóligin buzý jumystary júrgizilip jatyr. «Aq-Jaıyq» jobasy qalany munaı sektoryna táýeldilikten aryltyp, týrızm men bıznes salasyn damytýǵa baǵyttalǵan «Arman qala» konsepsııasynyń mańyzdy bóligi sanalady.
