Sahna syrtynda el kórmegen, biz bilmeıtin qanshama qajyrly eńbek jatyr. Sony eskergendeı, bıylǵy marapattaý rásimi Ǵ.Músirepov atyndaǵy Qazaq memlekettik akademııalyq balalar men jasóspirimder teatrynda, sol Ǵabeńniń: «Teatr óneri – has sulýdyń kóz jasyndaı móldir óner», degen qanatty sózinen bastaý aldy.
Teatr qaıratkerler odaǵy men Almaty qalalyq ákimdiginiń qoldaýymen dástúrli túrde beriletin bul syılyq iri shaharlardaǵy sahna qaıratkerlerin ǵana emes, elimizdiń ár óńirindegi jetekshi memlekettik teatrlardy da baǵalap keledi.
– Báıgeden úmitkerler aıtarlyqtaı kóp jáne birinen-biri ótken myqtylar, úzdikterdi anyqtaý ońaıǵa túspedi. Sarapshy retinde basynan aıaǵyna deıin tolyq qatystym. Al dramatýrg retinde «Jyl dramatýrgi» syılyǵyn Qazybek Amanjolǵa tabystaýym – erekshe este qalatyn qýanyshty jaǵdaı. Kópten beri О́ner akademııasynda jas dramatýrgterdi baýlyp júrgendikten, olardyń árbir jetistigine shyn qýanamyn. Teatr óneri, eń aldymen, sol ulttyń dramatýrgııasynan bastaý alady, – deıdi elimizge tanymal dramatýrg Sultanáli Balǵabaev.
«Eńlikgúl – 2025» syılyǵyn tabystaý saltanaty Abaı atyndaǵy Qazaq ulttyq opera jáne balet teatryndaǵy «Shelkýnchık» baletiniń alqyzyl valsinen bastaldy. Al M.Áýezov atyndaǵy Qazaq ulttyq drama teatry Ýzeır Gadjıbekovtiń «Arshyn mal alan» spektaklinen úzindi ala kelgen.
Sonymen «Jyldyń eń úzdik spektakldi jaryqpen kórkemdeýshisi» júldesin Hadısha Bókeeva atyndaǵy Batys Qazaqstan oblystyq drama teatrynan Ádiljan Baıshashaqov áketti. Al «Jyldyń úzdik mýzykamen kórkemdeýshisi» syılyǵy Shymkent qalasyndaǵy orys drama teatrynyń qyzmetkeri Vladımır Kýlıkovqa buıyrdy.
«Jyldyń eń úzdik teatr menedjeri» ataǵy S.Qojamqulov atyndaǵy Ulytaý oblystyq mýzykalyq drama teatrynyń beldi qyzmetkeri Dosqan Sákenge berildi. «Jyldyń eń úzdik teatr týraly maqalasy» júldesin «Masadan korolge deıin» kitaby úshin Beıbit Álkeeva aldy.
«Jyldyń úzdik dramalyq spektaklder baletmeısteri» atalymyn «Raechka», «Seni súıem», «Gamlet. Sońǵy kúnder» spektaklderindegi jumysyna Ǵ.Músirepov atyndaǵy Qazaq memlekettik akademııalyq balalar men jasóspirimder teatry baletmeısteri Saltanat Beımısheva qanjyǵalady.
«Balalarǵa arnalǵan spektakldegi jyldyń úzdik shyǵarmashylyq jumysy» júldesi Almaty Memlekettik akademııalyq qýyrshaq teatryna, «Jyldyń eń úzdik teatr sýretshisi» júldesi K.Stanıslavskıı atyndaǵy Qaraǵandy oblystyq orys drama teatrynyń qylqalam sheberi Elena Kımge, «Teatr ónerine uzaq jyldar sińirgen eńbegi úshin» atalymy Muhtar Áýezov atyndaǵy Qazaq ulttyq drama teatrynyń ártisi, Qazaqstannyń halyq ártisi Núketaı Myshbaevaǵa, «Teatr ónerin damytýǵa qosqan úlesi úshin» atalymy Qalıbek Qýanyshbaev atyndaǵy Qazaq ulttyq mýzykalyq drama teatrynyń ártisi, Qazaqstannyń eńbek sińirgen qaıratkeri Túımehan Atymtaevaǵa, «Eń úzdik jyl rejısseri» marapaty Muhtar Áýezov atyndaǵy Qazaq ulttyq drama teatryndaǵy «Qara», «Jarmaq» spektaklderi úshin Juldyzbek Jumanbaıǵa, «Eń úzdik jyl aktrısasy» ataǵy N.Bekejanov atyndaǵy Qyzylorda oblystyq akademııalyq mýzykalyq drama teatrynyń ártisi Zalıpa Tólepovaǵa buıyrdy.
«Eń úzdik jyl akteri» syılyǵy Ǵ.Músirepov atyndaǵy Qazaq memlekettik akademııalyq balalar men jasóspirimder teatrynyń ártisi Shaǵýan Úmbetqalıevke «Gamlet. Sońǵy kúnder» qoıylymyndaǵy – Gorasıo, «Revızor» spektaklindegi –Bobchınskıı róli úshin berildi.
«Eńlikgúl – 2025» syılyǵynyń bıylǵy ıegerlerine estrada tarlandary ónerden shashý shashty.
ALMATY
