Foto: istockphoto.com
Bul týraly О́nerkásip jáne qurylys vıse-mınıstri Iran Sharhan Úkimette ótken baspasóz máslıhatynda málimdedi. Onyń málimetinshe, 2025 jylǵy zertteýler nátıjesinde elimizdiń qory 98 tonna altynmen, 36 myń tonna myspen jáne 1,3 mıllıon tonnadan astam fosforıtpen tolyqqan.
El kartasynda paıda bolǵan jańa baılyq kózderi – Kókjon, Altyn-Shoko, Samombet, Stýdencheskıı jáne Taqyr-Qaljyr ken oryndary endi resmı túrde memleket menshiginde. Sonymen qatar Qaraǵandy oblysynda álemdik naryqta suranysqa ıe sırek kezdesetin metaldardyń jańa ýchaskesi tabyldy.
«Biz jer qoınaýyn zertteý aýqymyn keńeıtip jatyrmyz. 2026 jylǵa qaraı zerttelgen aýmaq kólemin 2,2 mıllıon sharshy shaqyrymǵa jetkizemiz», dedi Iran Sharhan.
Qazynany izdeý jumystary munymen toqtamaıdy. Úkimet geologııalyq barlaýdyń jańa deńgeıine ótý úshin rezervten 240 mıllıon teńge bóldi. Endigi kezekte Ulttyq geologııalyq qyzmet zamanaýı aerogeofızıkalyq tehnologııalardy qoldanyp, jer astyndaǵy baılyqty áýeden-aq anyqtaıtyn bolady.
2026-2028 jyldar aralyǵynda taǵy 100 myń sharshy shaqyrym jerdi egjeı-tegjeıli tekserý josparlanyp otyr.
