Qazaqstandyq startap ekojúıesi úshin bul - sırek kezdesetin ári mańyzdy oqıǵa. StartX asa qatań irikteýimen tanymal jáne negizinen Stanford túlekterimen nemese shekteýli resmı seriktester arqyly ǵana jumys isteıdi.
StartX - kommersııalyq emes akselerator. Ol kompanııalarǵa emes, tikeleı faýnderlerge baǵyttalǵan. Baǵdarlama aıasyndaǵy jumys jabyq faýnderlik toptarda (Neighborhoods) júrgiziledi, munda bıznestiń ósýi, strategııalyq sheshimder qabyldaý, ınvestısııa tartý jáne basqarýshylyq qatelikter talqylanady. Qatysýshylardyń basym bóligi - Stanford ýnıversıtetiniń stýdentteri men túlekteri.
TrustMe kópsatyly irikteýdiń barlyq kezeńinen ótip, baǵdarlamaǵa qatysýǵa resmı offer aldy. О́tinim berý barysynda kompanııa StartX-tiń Qazaqstandaǵy resmı seriktesi - Astana Business Campus uıymymen de ózara jumys júrgizgen.
TrustMe-diń StartX-ke qabyldanýy kompanııanyń AQSh naryǵyna belsendi shyǵý kezeńimen tuspa-tus keldi. Qazirgi ýaqytta TrustMe negizin qalaýshy Shyńǵys Dáýletbaev AQSh-ta júr, komanda amerıkalyq tehnologııalyq ekojúıege ıntegrasııalaný men naryqtaǵy qatysýdy kúsheıtý baǵytynda jumys atqaryp jatyr.
«TrustMe-diń AQSh naryǵyna shyǵýyna baılanysty sońǵy eki aıdan beri osyndamyn jáne otbasymdy da ózimmen birge kóshirýdi josparlap otyrmyn. Bul - sanaly ári ońaı qabyldanbaǵan sheshim. StartX baǵdarlamasynyń taımıngi AQSh-ta keńse ashý josparymyzben tolyq sáıkes keldi», - dep jazdy Shyńǵys Dáýletbaev áleýmettik jelidegi jazbasynda.
Sondaı-aq jazbada kompanııanyń Techstars akseleratoryna qatysýdan sanaly túrde bas tartqany atap ótilgen. Tańdaý StartX-tiń jabyq faýnderlik ortasy men Stanford ekojúıesine tikeleı qol jetkizý múmkindigine baılanysty jasalǵan.
