Maǵaýın álemi

Semınar ýnıversıtettiń bas­qarma tóraǵasy Nurlan Dý­latbekovtiń quttyqtaý hatymen ashyldy. «Maǵaýın shyǵarmalary – ulttyń rýhanı aınasy, tarıhı zerdesi. Olar táýelsizdik rýhyn oıatyp, azat oıǵa jol saldy» delingen onda. Semınar Maǵaýın álemin jańa qyrynan zerdelep, jas zert­teýshilerge baǵyt-baǵdar berýdi kózdepti.

Ǵylym jáne joǵary bilim mınıstrligi Til saıasaty komıtetiniń tóraǵasy, fılologııa ǵylymdarynyń kandıdaty Erbol Tileshov:

«Ol ataq-dańq úshin emes, tutas ulttyń rýhyn kóterý úshin jazdy. Búginde jazýshy shyǵarmashylyǵynyń tereń mánin tolyq ashatyn ǵylymı taldaý jetispeıdi. Bul – eskirgen ádistemeden týyndaǵan másele. Ony jas ǵalymdar túzetedi dep senemiz», dedi.

Edige Muhtaruly ákesiniń jastarǵa qatysty ósıetterin ortaǵa saldy. Onyń aıtýynsha, Muhtar Maǵaýın úshin jas­tar – eldiń erteńi, ulttyń úmiti bolǵan.

«Ákem shetelde júrse de, Qazaq­standaǵy jastardyń bolashaǵyna únemi alańdaıtyn. «Ulttyq sana qalyptaspaı, shynaıy táýelsizdik bolmaıtynyn» eske salýdan jalyqpaıtyn. Táýelsizdikke qol jetkizgenimizben, sananyń azattyǵy áli de qajet deıtin. Jastar erkin oıdy dáripteıtin shyǵarmalardy oqýǵa tıis ekenin jıi aıtatyn», dedi Edige Muh­taruly.

Abaı atyndaǵy Memlekettik syılyq­tyń laýreaty, aqyn Serik Aqsuńqaruly Muhtar Maǵaýınmen jeke kezdesken kezdegi áserleri men qalamgerdiń shyǵar­mashylyǵy týraly oı qozǵap, onyń ult­tyq rýhanııattaǵy rólin erekshe atap ótti.

Qaraǵandy ulttyq zertteý ýnıver­sıteti marketıng jáne rekrýtıng basqarmasynyń basshysy Azamat Dúısembaev «Ulylardy ulyqtaý urpaq paryzy: Maǵaýınniń aqtyq sapary men 85 jyldyǵy» atty baıandama oqydy. Fılologııa ǵylym­darynyń doktory, professor Jan­saıa Jarylǵapov baıanda­masynda Muhtar Maǵaýın shy­ǵarma­shylyǵy qazaq ádebıe­tindegi betburysty kezeń bolǵanyn atap ótti. Onyń aıtýynsha, jazýshy burynǵy estetıkalyq qaǵıdalardy qaıta qarap, ádebı oıǵa jańa fılosofııalyq serpin ákeldi. Belgili kásipker Erlan Áshim «Maǵaýın fenomeni», ǵalym Saǵymbaı Jumaǵul «Muhtar Maǵaýın – handyq dáýir ádebıe­tiniń zertteýshisi», jýrnalıst, veloshabandoz Ernat Rahmetolla «Sertine berik qalamger» degen taqy­rypta oılaryn ortaǵa saldy.

Taǵylymdy jıyn ult rýhanııatynyń alyp tulǵasyna taǵzym ǵana emes, Maǵaýın murasyn jańa býynǵa tereń tanytýdyń mańyzdy alańyna aınaldy.

Qaraǵandy oblysy